Oscar 2025 Governors Awards-ah Dolly Parton leh Tom Cruise ten chawimawina dawng
Academy of Motion Picture Arts & Sciences buatsaih 2025 Governors Awards chu an sem leh ta a, Doly Parton, Tom Cruise, Debbie Allen leh Wynn Thomas ten honorary Oscar an dawng. Dolly Parton hi award semnaah a inlan thei lo a, a lawmthu sawina video clip an tichhuak thung.
Dolly Parton hi he hunah hian thil pawimawh dang avangin a inlan thei lo nain, chawimawina pualin mihrang hrangin a pualin hun an hmang a, 1980 film Nine to Five-a a chanpui Lily Tomlin chuan award hlanna hun a hmang a, Andra Day-i’n Parton hla hit ‘Jolene’ a sa a, he huna chawimawi dawng ve tho Tom Cruise pawhin Parton pualin hun a hmang a, “American original, singer/songwriter, actress, storyteller, midangte tanpuitu ropui a ni a, a performance, a hla leh a hnathawh te hian kan nunah hmun pawimawh a chang a ni,” a ti.
Dolly Partin hian Jean Hersholt Humanitarian Award a dawng a, he chawimawina hi midangte tana a thilphalna leh midangte tanpuina kawnga a thawh nasat vanga hlan a ni. He award hi music star zingah Frank Sinatra (1970), Danny Kaye (1981), Quincy Jones (1994), Harry Belafonte (2014) leh Debbie Reynolds (2015) ten an lo dawng tawh bawk.
Tom Cruise hi film lama a thawh hlawk avang leh film hmasawnna atana a inpekna avangin honorary Oscar hlan a ni a, hei hi a Oscar dawn hmasak ber a ni. Tom Cruise hi Hollywood actor zinga huhang nei lian berte zinga mi niin, kum 40 vel zet lemchan khawvelah a inhmang tawh chung pawhin Oscar a la dawng ngai lo a, tunah hian honorary Oscar an hlan ta a, honorary ni lo, a competitive Oscar erawh a la dawng ta chuang lo a ni.
Cruise hi Oscar nomination-ah chuan 1989 khan Born on the Fourth of July film avangin nominate a ni a, 1996-ah Jerry Maguire leh 1999-ah Magnolia avangin nominate a lo ni tawh bawk a, 2022 khan Top Gun: Maverick avangin best picture-ah producer a nihna avangin nominate a lo ni tawh bawk a, award erawh a la dawng lo.
Oscar 2025 Governors Awards-ah Dolly Parton leh Tom Cruise ten chawimawina dawng
