Kum chawhma lam atangin khawvel hmun thenkhatah Covid-19 an sawi leh a, India ram state thenkhatah pawh a vei an pung. Mizoramah erawh he hri hi a hluar rih lovah ngaih a ni.
Hri vei hriat thar hi chu an awm ve leh zeuh thin a, vanneihthlak takin ngaihtuahawm an ni ngai lo, IDSP hotute’n an ti a, Covid-19 a hluar rih lo an ti.
Hri vei hriat thar an awm leh hi a hluar tihna a ni lo an ti a, min chen chilh tawh vang a ni an ti. Hetianga hriat thar hi an awm tura ngaih a ni an ti a, chutiang chu khawvel dinhmun a nih thu an sawi bawk.
Integrated Disease Surveillance Programme (IDSP) chhinchhiah danin, kuminah Covid-19 vei mi 11 an awm tawh a, July ni 11-ah khan enkawl lai pathum an awm. July ni 12-a result an puan danin, mi pasarih endik an ni a, pakhatin hri a lo vei a ni. Tichuan hri vei enkawl lai pali an awm ta a ni.
Hri vei hriatchhuahte hi natna dang vanga damdawi ina enkawl, fimkhur thu leh rinhlelh vanga endik an ni vek.
Kum liam tate enin, ruah sur tan vel atangin Covid-19 vei an pung thin an ti a, kuminah pawh ruah sur tan tirh vel atangin hriat thar an awm an ti. Hri leh sik leh sa hian inzawmna a nei an ti a, malaria leh rannungseh natna te pawh fur laiin a tam thin a, Covid-19 pawh hi chutiang deuh chu a ni an ti.
Kumina hri vei hriat thar hmasak berte hi May ni 30-a mi an ni a, pahnih, naupang ve ve an ni. Nikum November hnua hri vei hriatchhuah leh hmasak an ni a, nikum khan hri vei hi mi 73 an awm.
ovid-19 hluar rih lovah ngai
