A concert-naah stage-ah bak (bat) lu a seh bung, tih kha kan hriat lar hmasak dan a ni (hei hi a ni tak tak, 1982 khan Des Moines, Iowa-ah stage-ah mipui hmaah, bak lu a seh chhum tak tak. Bak mai ni lovin Thuro (dove) nung lai lu pawh a seh bung tawh). A khawsak dan avanga ‘Prince of Darkness’ an tih hial, metal legend Ozzy Osbourne, kum 76, chuan July ni 22 khan chatuan ram a pan ta. Kar liamta mai, July ni 5 khan Ozzy leh Black Sabbath-in an bul Tanna, Birmingham, UK-ah concert hnuhnung an nei a (a concert hnuhnung ber a ni ta tak tak), kha concert aTang khan charity atan dollar maktaduai 190 an hmuchhuak thei a, charity concert a Tum khata sum hmuhnem ber record an siam nge nghe.
A aw a danglam a, aw thâm pûk deuh ruih neiin, a khawsak dan danglam tak avang te pawh a ni tel bawk ang chu, heavy metal band Black Sabbath forntman atan pawha duhthusam a ni chiang e. Black Sabbath angin an hlawhtling hle a, solo pawhin a la hlawhtling lehzual. Rimawi khawvelah a hming a dai leh tawh lo ang tih tur kawpa huhang nei ni mah se a hun hnuhnung lam, 2019 aTang khan Parkinson’s disease avangin enkawl a ni a, mahi tawka chesawn hleithei loin a hun tawp lam nun a hmang liam ta a ni.
1970-ah Black Sabbath aTangin a rimawi zinkawng a zawh Tan a, an band hi stage-ah mitthi vui tur ang maiin, an inthuam dum deuh zûn Thin a, a hminglem atana Prince of Darkness tih pawh hi a nih tak tak duh hmel riau Thin. 1980-ah solo lamah kalin, 1981-ah record company-a executive te nen meeting an neih laiin Thuro nung lai lu a seh bung hmawk mai a, a kum leh maiah a concert-naah, stage-ah bak thi tawh lu a seh bung leh bawk. Rimawi piah lamah TV-ah pawh a nupui Sharon Osbourne leh an fate nen MTV series ‘The Osbournes’ an hlawhtlin pui hle bawk.
Black Sabbath angin 2006 khan Rock and Roll Hall of Fame-a lak luh a ni a (solo artist angin 2024-ah an la lut leh bawk), Black Sabbath nena album pakua an tlangzarh te chu RIAA Gold (US-ah copy 5,00,000 chin hralh theih) an kai vek a, chung zinga panga chu RIAA Platinum (US-ah copy maktaduai hralh theih) an kai bawk. A solo album-ah chuan 1991-a a album ‘No More Tears’ kha US-ah copy maktaduai 3 an hralh tling a, Billboard 200 (albums) chart-ah a vanglaiin No.7 a kai. A solo album dang pasarih te pawh Billboard 200 chart-ah top 10 kai vekin, a hla 17 te chu Billboard Mainstream Rock Songs chart-ah top 10 a, pahnih chu No.1 an kai thei bawk. 1996-ah heavy metal chawilar nan tiin Ozzfest a buatsaih a, a hlawhtling hle.
Ozzy Osbourne tia hriatlar tak hi a lai-ah hming chu John Michael Osbourne niin, December ni 3, 1948 khan, Birmingham, England-ah a piang a, unau paruk zinga a palina niin, elementary school a kal laiin ‘Ozzy’ tiin an ko Tan a, chu chu khawvel mitam zawkin an hriat dan a ni zui ta a ni.
A nu Lilian leh a pa John te chu kut hnathawk niin, an chhungkaw khawsak a awlsam bik lo a, chuvangin rimawi lama kala hlawhtlinna lamtluang zawh theih dan a suangtuah nasa Thin. Beatles hla “She Loves You” tih a ngaihthlak aTangin musician nih chakna a nei ta a, tleirawl kum 15 mi lek a nih laiin school a chawlhsan, in saknaah te a inhlawh kual ve lawp lawp a, ruk ruk te pawh a tum ve tawh, “Kar thum pawh chutiang chu ka tihman lo, min man chhuak rang khawp,” tiin 2014 khan The Big Issue-ah a sawi chhuak a, “Ka lo mawl Thin hawp mai,” a ti.
A pain a bail duh loh avangin kar ruk Winson Green Prison-ah a tang ve ran a. A pa hian microphone lei sakin, rimawi lama ngawrh lehzuala kal tumin a inbuatsaih ta a ni. 1967 khan a vawi khat nan live performance a nei ta a, a hnua Black Sabbath bassist ni zui ta, Geezer Butler-a’n a band Rare Breed atan a ruai a, mahse, show vawi hnih chiah an nei hman tihah Rare Breed kalsanin, Butler nen hian a hnua Black Sabbath member ni zui ta, guitarist Tony Iommi leh drummer Bill Ward te an zawm a, a tirah ‘Earth’ an inti hmasa a, mahse, 1969 aTangin Black Sabbath an inti ta a ni.
Warner Bros. Records hnuaiah inziak lutin, an band hming chawiin an album hmasa ber ‘Black Sabbath’ an tichhuak ta a, British album chart top 10-ah langin, Billboard 200 (US albums chart) top 25-ah a lang bawk a, US lam chart-ah hian kum tluanin a lang zui a, an album pahnihna ‘Paranoid’ chu Billboard 200-ah No.12 kaiin, he album-a an hla ‘Iron Man’ leh ‘Paranoid’ chu Billboard Hot 100-ah a lang nghe nghe.
An album pathumna tur ‘Master of Reality’ an tlangzarh hma lawkin, 1971 khan Ozzy chu Thelma Riley nen inneiin, Thelma nen hian fa pahnih an nei. 1970s tawp lamah Sabbath chu an lar tawh hle a, mahse, ruihhlo lamah Ozzy chu a tlan nasa ta a, band chhungah inhmuhthiam lohna te awmin, 1979-ah Ozzy chu band aTangin an chhuah tir a, a aiawh turin Rainbow singer hlui Ronnie James Dio an la lut ta a ni.
Black Sabbath aTanga a chhuak chu a tal hiar hman biau a, mahse, a band hlui leh amah ngei pawhin manager atana a hman Don Arden-a fanu, Sharon Arden chuan buaipui ta a. Don Arden chuan ama pual band din tura fuihin, a solo album hmasa ber ‘Blizzard of Ozz’ a tihchhuah theih nana mi Tangkai a ni zui a, he album hi Ozzy rimawi zinkawnga a kutchhuak hralh tla ber a ni zui ta a. He album-a hla ‘Crazy Train,’ ‘Goodbye to Romance’ leh ‘Mr. Crowley’ te chu a hit hle a, ‘Mr Crowley’ hi chutihlaia Satanist Aleister Crowley behchhana guitarist Randy Rhoads nena an phuah a ni.
1981-ah a solo album pahnihna ‘Diary of a Madman’ tlangzarh lehin, copy maktaduai 3 chuang a hralh thei a, mahse, a kum lehah a band guitarist Randy Rhoads chu vanduaithlak takin thlawhtheihna chesualah a boral ta hlauh a, Ozzy hian a tuar hle, Mahse, thla li hnuah Sharon nen inneiin, rimawi lamah a inhmang zui zel a, a solo album te pawh a hlawhtling viau zel a, US-ah 5,00,000 aia tam a hralh thei vek a, Billboard 200-ah pawh top 25-ah a lang pha vek a, a studio album hnuhnung ber chu 2019-a a tlangzarh ‘Patient Number 9’ kha a ni ta a ni.
2011 khan Black Sabbath original lineup reunion tour neiin, album tihchhuah an tum a, drummer Bill Ward-a’n a telhpui theih tak loh avangin Rage Against the Machine drummer Brad Wilk hoin an ti ta a. Kum hnih hnuah, Black Sabbath chuan Ozzy Osbourne hoin, kum 30 hnua an album hmasa ber ‘Titled 13’ an tlangzarh ta a, UK leh US (Billboard 200)-ah No.1 a kai ve ve. An band hian 2016 khan farewell tour neiin, February 2017-ah final show an nei a, Ozzy pawhin solo artist angin farewell tour 2018-ah a nei ve leh ta a ni.
Grammy Award panga dawng tawh, Ozzy chu a kum a lo tam ve telh telh a, a taksa hriselna a pan tawlh tawlh a, 2019-ah Parkinson’s disease a neih thu puan a ni a, July ni 5, 2025 khan Birmingham-ah a show hnuhnung ber turin ‘Back to the Beginning’ tiin, charity concert an nei a, hetah hian Black Sabbath pawh inlanin, heavy metal lama band ropui- Metallica, Mastodon, Anthrax, Pantera, Alice in Chains, Gojira, Slayer bakah he show atana supergroup an din Guns N’ Roses, Smashing Pumpkins, Limp Bizkit, Judas Priest leh Rage Against the Machine a member te telna te pawh an perform. He show behchhana an buatsaih ‘Back to the Beginning: Ozzy’s Final Bow’ tih documentary pawh 2016-a tlangzarh turin an siam nghal bawk.
Ozzy hian 2009 khan a memoir ‘I Am Ozzy’ a tichhuak a, he lehkhabuah hian a natna chungchang te pawh a tarlang a, a hun hnuhnung lama a nun hrehawm ta viau chungchang sawiin, “En teh u, naktuk maiah ka liam ta a nih pawhin, eng nge sawi theih ka neih. Khawvel hmun tinah ka kual tawh a. Hmuh loh a hleih pawh ka nei tawh lo. Tih That leh tihsual pawh ka ngah tawh. Mahse, tunah hi chuan han liam thut mai chu ka la zuam lo deuh,” a ti. He lehkhabu chhunzawm “Last Rites’ pawh a thih hma lawk hian a zo fel leh hman tawh bawk.
Ozzy hian a nupui hmasa Thelma Riley leh an fate pahnih, Jessica leh Lewis bakah an fa lak Eliot leh a nupui hnuhnung zawk, Sharon leh an fate pathum, Aimee, Kelly leh Jack te a kalsan.
OzzyOsbourne a awmta lo
