Inrinni a NBA khelhah Houston Rockets player pawimawh Kevin Durant chuan Portland Trail Blazers lakah point 30 a thawkchhuak a. NBA-a point thawhchhuak tam zual zingah pasarihna a ni thar a, Wilt Chamberlain a khum.
Durant-a’n hnuhma thar a hnutchhiah tum hian Houston Rockets hian hnehna an chang zo lova, Portland Trail Blazers lakah point 111-105 in an tlawm. Blazers lakah an team chakpui zo lo mah se Kevin Durant hian point 30 a thawkchhuak a, a chetha thawkhat viau thung.
Durant hian NBA-ah point 31,435 a thawkchhuak tling chiah a, NBA-a point thawhchhuah tam lamah pasarihna niin player ropui Wilt Chamberlain a khum chiah. Chamberlain hian NBA-ah point 31,419 a thawkchhuak a. NBA a point thawkchhuak tam zual zingah a chung lam a luah reng thin. A chawlh hnuin player tha dang an rawn chhuak ve zel a, a tawlh hnung ta hret hret thung.
NBA player ropui zinga tel reng tawh tur Chamberlain hi kum 1999 khan a boral. NBA a khelh chhungin hnuhma ropui tak a hnutchhiah a, NBA game khatah point 100 thawkchhuak thei awmchhun a la ni reng a. NBA a khelh chhungin Philadelphia 76ers leh LA Lakers te a champion pui bawk. Kum 1962 khan NBA game tinah point 50.4 thawkchhuak ziah ang a ni a, a chetha rem rem hle. Kum 1973 khan NBA-a point thawkchhuak hnem ber ni chungin Basketball a chawlhsan.
NBA-ah hian point 42,601 thawkchhuak tawhtu LeBron James chu point thawkchhuak hnem ber a la ni reng a. James hian LA Lakers tan a khel mek a, a record tihzau belh theihna hun tha a la nei. Chamberlain tlanpeltu Kevin Durant pawhin NBA a la khel mek a, NBA a point thawkchhuak tam zual zingah invawrhsan theihna hun tha tak a la nei. Durant chung chiahah hian point 31,560 Dirk Nowitzki a awm mek a, Durant nen an inkarah point 125 chiah a tlazep tawh.
NBA a point thawkchhuak hnem zualte:
LeBron James* – 42,601
Kareem Abdul-Jabbar – 38,387
Karl Malone – 36,928
Kobe Bryant – 33,643
Michael Jordan – 32,292
Dirk Nowitzki – 31,560
Kevin Durant* – 31,435
Wilt Chamberlain – 31,419
Shaquille O’Neal – 28,596
James Harden* – 28, 563
Pa 7-naah Kevin Durant
