Thawhleh zing khan NBA 2023-24 khelh chhunzawm a ni a. Eastern Conference-ah paruknaa awm mek Indiana Pacers chuan an conference-a hmahruaitu Boston Celtics an hneh a, hnehna lian an chang. Inkhel dangah Giannis Antetokounmpo chetha mah se Milwuakee Bucks tlawm tur a chhanhim zo chuang lo thung.
Inadiana Pacers hian Eastern Conference hmahruaitu Boston Celtics lakah bul an tan tha lova, quarter hmasa pahnihah hnufual zawkah an tang. Celtics an hmachhawn chhung hian quarter khatah chiah chungnung zawk an ni a, quarter thumnaa an chet that an chakpui. Celtics hi quarter khatna inkhel hmuhnawm takah point khatin an chungnung hram a. Quarter hnihnaah khel tha hretin, point riatin an chungnung zui leh a. Point 9 a hmahruai chungin chawlhlawk a hmang.
Hnehna chan ngei tuma tan khawh Indiana Pacers in chawlhlawk an hmang tangkai a, chawlhlawk hnu lamah tha zawkin an inlan. Quarter thumnaah point 11 zetin chungnung zawkah an tang a, chak beiseina thar an nei. Quarter hnuhnung berah chak tumin an innawr tawn nasa hle a, an inlehthal tawn zak zak. Quarter hnu-hnung berah hian point an inluh chhawk zak zak hnuin point 30 ve ve an thawkchhuak a, chung-nung zawk an awm thei lo. Tichuan Indiana Pacers chuan hmahruaitu Boston Celtics chu point hnihin an hneh hram a, point 133-131 in hnehna pawimawh tak an chang.
Celtics laka an chak tum hian Pacers player pawimawh Tyrese Hali-burton a inhliam a, chhawr zui theih a ni lo. Hnehna an chan vangin lawm hle mah se an player pawimawh Tyre-se Haliburton a inhliam vangin Pacers lawm a kim lo. Haliburton hian kum 2022 khan Sacramento Kings atangin Pacers hi a zawm a, season kal mekah hian Pacers tan chawhruala point thawkchhuak hnem ber a ni a. Game 32 a khelh tawhah game tinah point 24.2 thawkchhuak zel ang leh assist vawi 12.7 neih ziah ang a ni bawk. Haliburton inhliam lai hian Bennedict Mathurin chuan point 26 thawkchhuak in, hna tha a thawk.
Indiana Pacers lakah tlawm mah se Boston Celtics hian season kal mekah vawi 28 hnehna changin, tlawm zawkah vawi riat an tang tawh a; Eastern Conference-ah hma an hruai chhunzawm zel. An hneh loh Indiana Pacers khan season kal mekah vawi 21 hnehna changin, tlawm zawkah vawi 15 an tang a, parukna an luah chhunzawm ve thung.
Inkhel dangah Utah Jazz chuan an khingpui Milwuakee Bucks chu point 132-116 in an hneh. Jazz laka an tlawm tum hian Bucks player pawimawh Giannis Antetokounmpo chuan triple-double a puitlin a. Point 25 thawkchhuakin, assist vawi 11 a neih bakah ball sawhlet vawi 10 a dawng tling bawk. Mimal takin chetha viau mah se Antetokounmpo hian Bucks tlawm tur a chhanhim zo chuang lo. Inkhel dangah Washington Wizards chu Oklahoma City Thunder lakah 136-128 in an tlawm a. Wizards hi vawi nga an tlawm zawnna chiah a ni
Pacers in Celtics an hneh
