PAGALHAM BEIHNA

Duh lohna lantir nan chanchinbu phek hma dumin chhuah
Jammu & Kashmir-a saptawng leh Urdu tawnga chhuah chanchinbu liante chuan firfiakte chatna avanga Pahalgam-a pawisawi lo civil mi 26 thah an duh lohzia lantir nan an phek hma rawng dumin an chhuah.
Greater Kashmir, Rising Kashmir, Kashmir Uzma, Aftab leh Taimeel Irshad te chuan phek hma a dumin an chhuah a. An thupuiah rawng var leh sena ziakin beihna an duh lohzia leh vantlang an tanrualzia lantirna hawi an tar lang hlawm.
Rising Kashmir chuan an thupui berah a varin, ‘TERROR STRIKES PAHALGAM’ tih an ziak lang a, thupui te deuh zawkah ‘civil mi 27, a tam ber khualzinte chu firfiaka cheten rawng takin an that,’ tih an ziak a. TERROR tih laia ‘O’ chu silai kahna avanga thisen far angin an chei bawk.
Greater Kashmir chuan ‘Gruesome: Kashmir Gutted, Kashmiris Grieving’ tiin a varin a dumah an ziak a. A chhungah ‘Pahalgam-ah firfiak chetnaah rawng takin mi 26 thah an ni’ tih an ziak.
Editorial thupuiah pawh ‘The massacre in the meadow – Protect Kashmir’s soul’ tih an hmang a. A chhungah Jammu & Kashmir chu thimin a bawh thu leh ‘’Paradise on Earth’-a chantir leh tura an beih dawn thu an tar lang.
Editorial-ah hian khualzinte kal tamna, ke leh sabengtung hmang chauhva thlen theiha thil thleng chuan intelligence leh agency-te thawhhona tha zawk a awm a tulzia a tilang tih an tar lang bawk.
Tlawh tum 90%-in an thulh phah
Pahalgam-a firfiak chetna lian tak a thlen hnuah Delhi-a travel agency-te chuan Jammu & Kashmir tlawh tuma hauh lawk tawh 90% dawnin himna thil avangin an thulh leh tih an sawi.
Shankar Market, Outer Circle, Connaught Place-a Swan Travellers neitu, Gaurav Rathi chuan an hnena union territory tlawh tuma hauh lawk 25 velin an thulh leh tih a sawi.
Hauh lawktu tam zawk hi thla thara Kashmir kal tum an ni a, tunah hian cancel an dil leh mek hlawm tih a sawi.
Thawhlehni tlai dar 03:00 vel khan mi firfiakten Pahalgam tlangrama Baisaran phaizawl beiin khualzinte an kap a. Heng lai hmun hi a ram hring mawi tak leh leilung pianhmang avangin ‘mini Switzerland’ tia sawi niin khualzinten an tlawh nasa hle.
Mi 26 an thi a, a tam zawk hi khualzin an ni.
Delhi-a travel agency-te chuan Kashmir tlawh tum thulh lehte hian hmun remchang dang tlawh zawk tura siamrem an dil hlawm tih an sawi.
“Chhungkaw eng emaw zat hauhtu kan nei a. Bus leh flight ticket atanga khualbuk thlengin hauh lawk vek tawh a ni a; mahse, firfiak chetna a thlen hnuah cancel leh dil kan dawng tam hle,” tiin Kusha Travels neitu, Dev chuan PTI a hrilh.
Gulmarg, Hajan Valley leh Tulip Gardens te chu khualzinten tlawh tuma an hauh lawk tam zual a ni.
“Tun thla leh thla thar atan hauhtu 20 chuang kan nei a; mahse, an zavai deuhthawin an rawn thulh leh,” tiin Good Guide Tours & Travels-a travel agent Kartik Verma chuan a sawi.
Travel agency dang, Swastik Travels chuan Kashmir hi Delhiite-ten an zin duhna ber hmun a ni lem lo tih a sawi a; mahse, hmun dang atanga Delhi tlawhtute chuan tlawh ngei an tum hlawm thin niin a sawi.
“Delhi-a chengte chauhvin cancel hi an dil lo va, khawpui lo thleng tawh khualzin tam takin Kashmir zin hi an thulh a ni,” tiin Swastik Travels neitu chuan a sawi.
“Kashmir chauh ni lo, Jammu pawh miin tlawh an hreh phah a. Katra-a Vaishno Devi shrine tlawh tum chhungkaw pasarih kan neihte pawhin an thulh a ni,” a ti.
Travel agency dang, AJ Tours & Travels chuan mite chu Jammu & Kashmir tlawh tuma hauh lawk tawh rih lo turin an ti tih an sawi.
“Travel Association of Srinagar atangin veivah leh hauh lawk ti tawh lo tura ngenna kan dawng a. Hauh lawk tur kan la tawh lo,” an ti.
Pahalgam beihna hi kum 2019-a Pulwama-a beihna thleng hnua Kashmir phaikuama beihna lian leh ber a ni.
Thi zingah hian ram dang mi pahnih leh tual chhung mi pahnih an tel a ni.
India-in Pakistan ramri a khar
India chuan a awp chin Kashmir-a silai kengten mi 26 an thah hnuah Pakistan lakah inkhuahkhirhna a kalpui tan a, an intlawhpawhna ber pawh a khar.
Ramri a khar bakah hian tui an insemna inremna a titawp a, palaite a chhuahtir bawk.
India hian a rama awm mek Pakistani thenkhat visa a tihtawpsak a, ni hnih chhunga chhuak turin a ti nghal a. Pakistan chu ‘ramri kâna firfiaka chetna a thlawpna’ titawp nghal turin a ti bawk a, hei erawh a hma atang tawha Islamabad-in a thlawp lohzia a lo sawi tawh thin a ni.
Thawhlehnia Himalaya tlangdunga hmun mawi tak, Pahalgam-a khualzinte beiha thah an ni ni tun hnai kum eng emaw zat chhunga Indian awp chin Kashmir-a firfiakte chetna rapthlak ber a tling.
Muslim tamna hmunah hian kum tam tak chhung chu helna a lo awm tawh.
Indian sorkar chuan beihna thleng hi na taka dem leh sawiselin Pakistan chu a phenah a awm ngei a rin thu pawh a sawi.
Indian security agency-te chuan a titute hi pawl pakhat, Kashmir Resistance tia an sawite niin an ring a, finfiahna erawh a la awm thei lo.
A titute zawn hna hi ngawrh taka thawh nghal mek zel a la ni.
Pakistan-a sorkar chuan an rama sipai leh venhimna lama rorelna sang ber, National Security Council chu Ningania thutkhawm a ko bawk.
Pahalgam-a beihna a thlen hnuah khan Pakistani foreign ministry chuan ‘khualzin tam tak thihna thleng chu pawi a tih thu’ a puang a, a ui tak zet thu a sawi bawk.
India hian hun rei tawh tak atangin Islamabad-a sorkarte hi Kashmir-a firfiak leh hel pawl puituah a puh tawh thin a, Pakistan chuan nasa takin a pha thung.
India-in Nilainia khuahkhirhna a puan zingah hian Delhi embassu-a awm, Pakistani military adviser-te pawh rang taka chhuak turin a ti a, palai dangte pawh karleh lamah hian chhuahtir an ni dawn tih thuchhuahah tar lan a ni bawk.
Pahalgam-a beihna thleng hian hun rei tawh tak atanga nuclear nei ram pahnihte inkara inrem lohna awm chu a tithar lehzual.
Indian sorkar chuan thuchhuah a siamah ‘beihna thlentute chungah dikna hlenchhuah a ni dawn a, a lo puia thlawptute pawh hai chhuah vek an ni dawn’ tih an tar lang.
India chuan ‘firfiaka chea pawi khawihte a zuah dawn lo va, an chet theihna tur remchang pawh siamsak a tum lo’ tih an tar lang bawk.
A hmain Defence Minister Rajnath Singh-a chuan India-in beihna a tawh a chhan letna tur chu a titute bitum maiah a tawp dawn lo va, a bak pawh an kal dawn tih a sawi bawk.
“He thil thleng titute-ah hian kan tawpsan mai dawn lo va, India leilunga rawng taka chete phena lo thute pawh kan phin darh vek dawn a ni,” tiin Singh-a chuan a sawi.
Pahalgam-a thil thleng hi ram dang hruaitu tam takte pawhin an dem thu an sawi a, an thinrim thu leh India an sunpui thu an sawi hlawm.
Thil thleng hmutute chuan thisen luang karah chhungkuaa chawlh hmangte nen an himna zawnga an tlanchhiat thu an sawi.
Mi thenkhat chuan a titute hian Muslim ni lote an bitum niin an sawi a, thenkhat erawh chuan tum bik pawh nei lova silai an hmeh puah pawp pawp thu an sawi thung.
Thi tam zawk hi Hindu mipa an ni a, tual chhung mi Muslim mipa pakhat a tel bawk.
India-a sorkar chuan silai kengte hian an sakhua azira bitum bik an nei em tih engmah an puang lo.
Pahalgam-a civil mite beitu mi panga hre tawh
Chhuitute chuan Pahalgam khaw bula khualzin beitu mi pangate an hre thei tawh a, an zinga pathum chu Pakistani an ni a, pahnih erawh Jammu & Kashmir-a cheng niin kum 20 dawn hnua helai hmuna mi sual chetna lian ber titute hi zawn mek zel an la ni.
Agency-te chuan Pakistani pathum – Asif Fauji (code name Moosa), Suleman Shah (code name Yunus) leh Abu Talha (code name Asif) te an tel thu an puang a. Kashmir Valley-a cheng zinga mi pakhat hi kum 2018-a Pakistan-a kal, Bijbehara, Anantnag-a cheng, Adil Guri, leh kum 2018-a Pakistan-a zin tawh tho, Pulwama-a cheng, Ahsan an ni tih an sawi.
Kashmiri pahnihte hi kum eng emaw zat Pakistan-a an training hnuah tun hnai khan India-ah an let leh a. Fauji leh Shah te erawh Jammu & Kashmir-ah an awm a, a hma pawhin mi beihnaah an lo tel tawh a, Poonch-ah pawh an lo che tawh niin an sawi.
Thawhlehnia Pahalgam-a Baisaran-a civil mite beihnaah khan a dam chhuakte chuan a beitute hian Islam tawngtaina sawitirin an sakhua an hre hmasa niin agency-te chuan dam chhuakte atangin an hria a, finfiahna erawh a la awm lo.
Urdu an hmang bawk a, hnai tak atangin an kap niin an sawi a. “An sakhua fiahna tur tih dan tur hnial chu an kap hlum nghal hmak hmak niin a lang,” tiin officer pakhatin a sawi.
Officer dangin, “An tum chiang tak chu sakhaw inhalna thlentir leh Kashmir-a khualzin pung leh mek tihkhaihlak a ni,” a ti bawk.
Jammu & Kashmir thuneitute chuan a titu nia hriat mi pathumte lem ziah tichhuak tawhin an chin hrilh theih hnenah Rs nuai 20 pek an tiam a. Chhuitute chuan a code name-a Moosa an tih hi May, 2024-a Poonch-a Indian Air Force (IAF) convoy beihnaah pawh khan a tel niin an hria.
Baisaran-ah hian CCTV camera a awm hnai lo va, chhuitute hi dam chhuakte thil sawiah an innghat tawp a. An tih tur an hlen hnu hian tlangsang lam, Pir Panjal an pan niin an hria.
Inspector General Vijay Sakhare-a kaihhruai National Investigation Agency (NIA) team chu Srinagar-ah inbunin an chhui mek a. Agency dang leh Jammu & Kashmir police ten an pui bawk.
He thil thlengah hian Lashkar-e-taiba chief Hafiz Saeed-a deputy zinga mi, Saifullah Kasuri-a a inrawlh em tih pawh en zui mek a ni.
February 2-a video a tihchhuahah Kasuri-a hian ‘Kashmir chu February 2, 2026 atang chuan ‘land of the pure’ a nih tawh tur thu a sawi a, ‘Mujahideen-ten ni rei loteah beihna thlenin Kashmir an tizalen dawn’ niin a sawi bawk.