PAHALGAM BEIHNA: Pak-in neutral-a chhui a duh
Pakistan chuan Indian-awp chin Kashmir-a khualzinte thah an nih chungchanga New Delhi-in Islamabad a mawhchhiat mek karah tan bik nei lo (neutral) taka chhui a duh thu a sawi a, chumi tur chuan thawhpui tura a inhawn thu leh muanna chu a duh dan a nih thu a sawi.
India chuan mi beitu pathum zinga pahnih chu Pakistani niin a sawi a, Islamabad chuan Thawhlehnia Indian 25 leh Nepali pakhat thahnaah inhnamhnawih engmah a nei lo tih a sawi.
“Pakistan chu tan bik nei lova chhuitute puia thu dik leh dikna hlenchhuah a nih theih nan a inhawng reng,” tiin Interior Minister Mohsin Naqvi-a chuan a sawi.
“Pakistan chuan muanna, ngialnghehna leh khawvel tih dan phung zawm a duh a, a ram tibuai erawh a palzam lo vang,” tiin thuthar lakhawmtuten an kawmnaah a sawi.
Pakistani Prime Minister Shehbaz Sharif-a chuan, “Pahalgam-a thil thleng khan mi dang puh chhiat tumna lantirna pakhat a ni,” tiin India-in a puh chu a dem thu a sawi.
Indian Prime Minister Narendra Modi-a chuan a beitute kha ‘khawvel tawp thleng pawhin’ an um zui dawn thu leh a ruahmantu, a phena awm zawng zawngte nen ‘an rinphak baka na hremna’ an pek tur thu a sawi.
Hetih lai hian India-ah chuan politician leh mi dang tam tak chuan Pakistan laka sipai chakna hmanga che tura nawrna a na sawt hle.
Pahalgam-a khualzinte thah an nih hnuah India leh Pakistan inkar hi a chhe nghal hle a, an inhrek tawn mek a. Pakistan chuan an van boruak chu Indian airline-te thlawh a khap a, India-in kum 1960-a an siam, Indus River leh a peng luite tui an insemna, Indus Waters Treaty chu a titawp lailawk nghal.
Ram pahnihte hian Kashmir hi an ram ve vea an chhal a ni a; mahse, tlem ve ve chauh an thunun a. Kum li lai thawm a reh hnuah ni hnih liam ta chhung khan ramriah an inkap tawn bawk.
Indian Army chuan an ramri, km 740-a thui, khawi lam mah mahin khawih loh tura tih bula Pakistan Army post atangin Zirtawpni zan lai vel atang khan silai tenau deuhva kah tan an ni tih a sawi a, tumah thi leh hliam erawh an awm lo.
Pakistani sipaite erawh chuan inkahna a awm thu hi engmah an la sawi lo.
Jammu & Kashmir ramria R S Pura khuaa Indian chengte chuan ram pahnih inkar a chhiat mek lai hian a tul huna an hman theih turin community bunker an buatsaih tan.
“Ramria cheng kan ni a. India-ah eng pawh thleng se kan awmna hi a tuar hmasa tur kan ni,” tiin a cheng pakhat, Balvir Kaur chuan Reuters news agency hnenah a sawi.
“Eng pawh thleng se lo hmachhawn tura kan inbuatsaih a ngai a. Indian sorkar hian a ramri hrula a mi chengte hi a ngaihven ber kher dawn lo va, keini pawh ram tana phur rit nih kan duh bik lo,” tiin anmahnia an inngaihtuah dawn thu a sawi.
India-a venhim hna thawktute chuan beitute hnu a chhui zel a, an awp chin Kashmir-a hel pawla tel nia an hriatte chenna in 10 a tichhe tawh a, pakhat hi Pahalgam beihnaa tel in nia hriat a ni.
Pulwama district-a Murram khuaa in tichhiat hi Ehsan Ahmed Sheikh-a chenna nia hriat ani a. Tual chhung mite chuan kum thum liam ta chhung khan an hmuh ngai tawh loh thu an sawi hlawm.
Indian thuneitute chuan ‘ram himna thilah’ sipai chet velna hi engmah live-a pek chhuah a phal lo
PAHALGAM BEIHNA: Pak-in neutral-a chhui a duh
