Pahalgam beitua inchhal, TRF chanchin UN-ah thlen

Pahalgam beitua inchhal, TRF chanchin UN-ah thlen
Indian thuneitute chuan UN Security Council-a 1267 Sanctions Committee monitoring team hnenah Pahalgam-a mi beitu, The Resistance Front (TRF) chungchang an thlen niin sorkar mi pawimawh, he lam hriaten Nilaini khan sawi.
Indian technical team hian New York tlawhin 1267 Sanctions Committee monitoring team leh United Nations-a an thawhpui ram dangte an hmu dawn a ni.
Team hian the UN Office of Counter-Terrorism (UNOCT) leh Counter-Terrorism Committee Executive Directorate (CTED) aiawhte pawh an hmu dawn a. Heng hma an lakna hi India-in khawvel huap firfiak pawla TRF chhiar a nih theih nana tih a ni.
Pakistan-a Lashkar-e-Taiba (LeT) hmatawng, TRF hian April 22-a Pahalgam-a mi 26 thahna kha an tihah an chhal a. Indian thuneitute chuan an hnu an chhui zuinaah ramri lehlam atangin thu petu an awm ngei niin an hria.
Kar kal ta Nilaini tuk khan India chuan Pakistan leh an awp chin Kashmir-a mi firfiak hmunte chu Operation Sindoor tia hming vuahin, Pahalgam beihna chhan let nan a kap a. Ni li chhung ram pahnihte an inbeih zui phah a, Inrinni tlai atang khan sipai hmanga inbeihna chu an tawpsan.
India hian 1267 Sanctions Committee monitoring team hnenah hian kum khata vawi hnih report an pek thinah nikum May leh November thla khan TRF hi Pakistan-a firfiak pawlte inzawmah an tel ngei tih an lo thlen tawh a. Hemi hma, December, 2023 khan India hian LeT leh Jaish-e-Mohammad (JeM) firfiak pawlte chu Jammu & Kashmir-ah pawl dang, TRF hmingin an awm tih a lo thlen tawh bawk.
Kar hmasa khan Indian Foreign Secretary Vikram Misri chuan, “Monitoring team nen an inkawm leh tep tawh a, a hmaa kan lo thlen tawh bak kan thlen belh leh ang,” tiin thuthar lakhawmtute hmaah a lo sawi tawh.
1267 Sanctions Committee hi mi/pawl hrek tur endika tichhuaktu an ni a, UN Security Council resolution 1267 hnuaiah hrekte enzuia an dinhmun thlithlaitu an ni bawk.
Monitoring team hnathawh pui ber chu 1267 Sanctions Committee-in mi firfiaka a chhal leh an thil neihte khawih theih lohva tih a nihna tura puih a ni ber a. An member ram atanga heng an hrekte chhuah emaw, an luh emaw ven leh mi mal leh pawl hnena ralthuam an pek ven a ni bawk.
Monitoring team hi Working Group on Tackling the Financing of Terrorism-ah member an ni nghal a, anni hi mi mal leh an thawhpuite sum lama hrekna tura hmalatu, Financial Action Task Force (FATF) leh a dangte nena tangho an ni leh a ni.