Pahnihnaah Arsenal an inhlangkai

January 30, Thawhleh zan khan English Premier League 2023-24 khelh chhunzawm a ni a. Nottingham Forrest lakah 2-1 a hnehna chang Arsenal chuan Manchester City an lehpel a, pahnihnaah an inhlangkai. Arsenal an chak laiin top 4 huang luah mektu Aston Villa chu an mikhual Newcastle United lakah an tlawm ve thung.
City Ground a lenglut Arsenal hian table hnuai lama awm Nottingham Forrest lakah an khel tha a, game an thunun tluan. Khel tha tak chungin goal erawh an thun thei lawk lo thung a, goal thun turin darkar khat chuang an nghah a ngai. Darkar khat chuang zet goal an thun theih loh hnuin minute 65-naah Gabriel Jesus chuan Oleksandr Zinchenko siamsak atangin hmahruaina goal a thun. Hmahruaina goal thun hnuin Gunners in nuam ti takin an khingpuite an hmachhawn zui a, an che fel a hmuhnawm hhle. Hmahruaina goal an thun atanga minute sarih hnu lekah Laipui a puak nawn leh nghal a, minute 72-naah Bukayo Saka chuan Gabriel Jessu siamsak atangin an goal hnihna a thun a, an hmahruaina a ti zau.
Si hniha hma an hruai hnuin Arsenal hian hun tawp dawn hnaihah goal an chhuah. Minute 89-naah mualneitu Nottingham Forrest tan Taiwo Awoniyi chuan goal thunin an si phurh a sut then. Goal an chhuah danah Arsenal player Ben White leh Oleksandr Zinchenko te an inhnial buai a, inkhelh banah pawh then an ngai hial. He thil thleng hi manager Mikel Arteta chuan a hmuh ngei thu leh a tha zawk duhna a nih vangin a ngaihhuat loh thu a sawi. Hun tawp dawn hnaihah goal chhuah bawk mahse Gunners hian goal dang an chhuah belh tawh lova, point thum an hmu zui ta a ni.
Nottingham Forrest laka point thum an hmuh hmangin Arsenal hian an chunga awm Manchester City an lehpel a, pahnihnaah an inhlangkai. Arsenal hian vawi 22 khel tawhin point 46 an hmu mek a, hmahruaitu Liverpool nen an inkarah point hnih chiah a tlazep tawh. Liverpool ai hian vawi khatin an khel tam zawk a, Manchester City aiin vawi hnihin an khel tam zawk thung a, an dinhmun hi danglam thei reng a la ni.
Villa an tlawm
An chung chiaha awm Arsenal an chak laiin Aston Villa chu Villa Park-a an mikhual Newcastle United lakah 3-1 in an tlawm a, top 4 huang atanga nekchhuah theih dinhmun him loah an ding.
Villa Park a lenglut Newcastle hian an khel tha viau a, darkar khat an inkhelh tlin hmain goal thum an thun hman der. Minute 32-naah Fabian Schär chuan hmahruaina goal a thun a. Schar hian minute 36-naah an goal hnihna thun zui lehin, si hnih faia hmahruai chungin chawlhlawk an hmang.
Aston Villa vanduai a kaltluang a, chawlhlawk hnu lamah goal an chhuah leh thuai. Minute 52-na lekah Álex Moreno chuan an lamah a ti-goal a, an mikhualte hmahruaina a tihzau sak. Si thum fai ngawta an hnufual hnu hian Ollie Watkins chuan minute 71-naah goal thunin an si phurh a sut then a, an mualpho lutuk tur a chhanhim. Hun tawp thlengin goal dang an thun belh thei tawh lova, an muala point hmuh an tumna an tipuitling zo ta lo.
Villa hian khelh 22 atanga point 43 hmuin palina an la luah a. An hnuai chiaha awm Tottenham aiin an khelh tlem zawk a, Spurs hian si hniha Brentford an hneh thei a nih chuan Villa an lehpel ang a, top 4 huang an luah ang.