PAHOSS sum bang cheng
vbch.20 LMC tan dah sak
Sawrkar hmasa hunlaia PAHOSS sum la hman ban cheng vaibelchhe 20 chu Lunglei Municipal Council (LMC) tan dah hran a ni.
LMC hotute hian hma an lak dan leh hmachhawp chu Zirtawpni khan Lungleia thuthar thehdarhtute an hrilh a. LMC chairman Lalzuithanga chuan LMC-in kum hnih hmel a hmu ta a, sawrkarin a enkawlnaah an lawm tih a sawi.
LMC chu mahnia inenkawl thei tura ngaih a nih angin, chumi tur chuan an inpuahchah reng a. Motor parking fee lak, advertisement leh hoarding tar phalna, building regulation leh ui khuahkhirhna dan sawrkarah thehluh a ni tawh a; PAHOSS sum bang atangin vbch.20 chu LMC tan dah niin, rotling tak siamnan hman a ni dawn tih a sawi.
Dawr siam phalna mi 750 hnenah pek a ni a, bawlhhlawh sawngbawlna tur hmun hnihah peihfel tep a ni a, bawlhhlawh thliar tura hma lak mek a ni a, faina lama hmalaknaah khawlai phiatfaitu – sanitation worker 24 an awm mek a, ward fai inelna LMC Award 2024 lawmman chu nakkum March-ah sem tum a ni tih a sawi bawk.
LMC chairman chuan thawktu 36 lak phalna sawrkarin a pekah sum indaih lohna avangin post nghet 5 leh nghet lo 13 lak tum a ni, tiin, urban local body (ULB) an nih tak avangin property tax 3.42% lak a ni dawn a, heta tanga 80% hi vengchhung hmasawnna hna thawhnan hman a ni dawn tih a sawi. LMC chuan Convention Centre an enkawl tawh a, Saikuti Hall pawh an enkawl dawn tih a sawi a ni.
Kumin December 2-a chatuan ram pan, MJA member Johan Lalhmunmawia sunna hman niin, LMC atanga an ralna sum chu Johan Lalhmunmawia nupui aiawhin MJA Lunglei District president Laltlanthanga’n a dawng a ni.
PAHOSS sum bang cheng vbch.20 LMC tan dah sak
