Pak-in an rama bomb vawi hnih tipuakah Afghan puh

Pak-in an rama bomb vawi hnih tipuakah Afghan puh
Pakistan chuan Afghan-ten tun kar chhungin an ramah vawi hnih thilhchilh bomb an tipuak niin a sawi a, Asian chhim lam ram pahnih inkar hi a khi mek zel.
Islamabad-in Afghan-te tiha a chhal hi Thawhlehnia an khawpuia courthouse bula tihpuah leh a hma ni chiaha sipai sikula tihpuah kha a ni a, ‘kan tan a pawimawh hle a ni’ tih Interior Minister Mohsin Naqvi-a chuan parliament-ah Ningani khan a sawi.
A hma pawha an lo sawi tawh angin Afghan Taliban sorkar chuan Pakistan beitu Islamist helho a tan tlat tih a sawi bawk.
Kum 2021 atanga Afghanistan-a thuneihna chang, Taliban hian Pakistan hi an ram chhunga ISIS-KP hel puituah a puh ve bawk a, an ramah erawh Pakistani hel tumah an awm lo niin a sawi bawk.
“A hma pawha kan lo sawi tawh thin angin ISIS-KP laka beihpui kan thlakna tam taka kan that leh mante hi Pakistani an ni,” tiin Taliban thupuangtu, Zabihullah Mujahid-a chuan Naqvi-a’n TV-a thu a sawi a chhuah hnu lawkah a sawi.
“Hetiang a nih avang hian Pakistani zawng zawng emaw, an sorkar emaw hi mawhphurtu an ni tihna a ni chuang lo,” tiin Mujahid-a hian a sawi bawk.
Tar lan tawh thin angin Thawhlehni khan Islamabad-ah hian court tualah police lirthei bul lawkah thihchilh bomb puakin mi 12 an thi a, mi 27-in hliam an tuar bawk.
A hma ni chiahah Afghanistan nena an inrina bul lawk, Waziristan district-ah sipai sikul gate chu puak thei phur lirthei nena suta thihchilh an awm a, mi pathum an lo thi tawh bawk.
Bomb a puah hnuah hian helhovin sipai enkawl sikul, civil mite lutna hi luhchilhin Pakistani sipaite nen darkar 24 chuang an inbei a, a hnuah that an ni.
Pakistan leh Afghanistan inkar hi tun hnaiah a khi nasa a, thla hmasa maiah pawh khan indovin sipai leh civil mi eng emaw zat an thi.
Pakistan hian India pawh a mil lo va, May thla khan ni li an indo nghe nghe.
Islamabad chuan Pakistani Taliban leh hel pawl dang, Afghanistan-a awmte hi India-in a pui niin a puh a, New Delhi-in a pha thung.
India leh Pakistan hian an ram himna atan a pawimawh nia ngaiin Afghanistan kawmngeihtu zawk nih an tum reng a; mahse, an dinhmunin a zir loh avangin hma erawh an sawn hlei thei lo ve ve.
Pakistani Taliban, Tehreek-e-Taliban Pakistan an tih bawk firfiak pawl hian kum 2007 atangin Pakistani sorkar paih thlaa an duh dana Islam sorkar din tumin an bei reng a ni.