Pakistan-in raltlante hnawtchhuak dawn

Pakistan chuan an rama asylum diltu Afghan khua leh tui maktaduai 1.7 vel zette chu November hmain an ram chhuahsan vek turin a ti.
Tun hnaiah ram pahnih inrina bul hnaiah tharumthawhna nasa zawkin a thleng reng a. Pakistan chuan Afghanistan ram chhunga inbunte chu heng pawikhawihna kalpuitute ber tiin a sawi a. Taliban sorkar erawh chuan a hnawl thung.
Mahse Islamabad lamah lungawilohna thuk zawk thlenin hei vang hian dan kalha an ram chhunga awm te chu hnawhchhuah ni se an tih phah ta a ni.
Kar kalta pawh khan Afghanistan nena inrina bula Mastung city a mosque-a bomb puak avangin mi 50 chuangin nunna an chan phah a.
Pakistan Interior Minister Sarfraz Bugti chuan thupek a chhuahah Mastung city a thil thleng leh Balochistan province a thil thleng te chu sawi lanna erawh a nei duh chuang lo thung a.
Ram danga inhumna dil hi international law-a awm thlap a ni a. Pakistan chuan Afghan refugees sang tam tak a bik takin kum 2021 a Taliban tena thuneihna Afghanistan-a an chan hnu atanga raltlan te a enkawl mek a ni.
Pakistan ram chhungah Afghans refugees 1.3 million vel an awm anga ngaih a ni a, heng zinga 880,000 vel zette chu dan anga chhinchhiah an ni tiin UN chuan a sawi.
Mahse a ram chhungah dan kalha raltlan awm maktaduai 1.7 vel zet an la awm tho tiin Minister Bugti chuan a sawi a. Heng mite refugee status la nei lote niin chung mite chuan November hmain Pakistan an chhuahsan vek a ngai a, la awm lui te chu tharum hmanga nawrchhuah an ni dawn a ni.
“An chhuak lo a nih chuan law enforcement agencies leh federal sorkar chuan tharum hmangin a nawrchhuah mai a ngai dawn a ni,” tiin Minister chuan a sawi a. Hei mai bakah hian Afghans tena dan ang lova Pakistan ram chhunga sumdawnna an kalpuite pawh chhuahsak an ni ang, a ti bawk.
Hetih lai hian Pakistan-a Afghans officials te chuan thuneitute chuan dan anga awm leh awm lote pawh thliar hrang lovin an vaihma vek tiin an sawi ve thung a. Tun hnai kar hnih chhung ringawtin Afghans 1,000 chuang man khawm an ni tawh tiin a tarlang bawk.
Balochistan province, Pakistan border bul maia awm hi ralthuam nena chetla thin Tehrik-e Taliban Pakistan (TTP) or the Pakistani Taliban leh Islamic State group tena chetlakna an neih khum fo na a ni a. Tun thla tir lamah pawh bomb puakah mi 11-in nunna helai hmunah hian an chan phah tawh bawk a.
Minister Bugti chuan January thla atang khan Pakistan border-ah suicide bombing tum 24 a thleng tawh tia sawiin heng zinga a zahve lawih hi Afghanistan ram chhunga inbun tena an tih tiin a sawi a. November 1 atang chuan Pakistan atanga Afghanistan lut te tan visa leh passport nei lo te chu hnar vek an nih tawh tur thu a sawi bawk.