Pakistan leh Afghanistan-a Taliban sorkarin inkahhai puang

Pakistan leh Afghanistan-a Taliban sorkarin inkahhai puang
Pakistan leh Afghanistan-a Taliban sorkar chuan ramria inbeihna a awm hnu leh Pakistani-ten thlawhna hmanga Kabul leh Kandahar nia sawi a awm leh hnuah inkahhai an puang tih an sawi.
Lehlam lehlam hian darkar 48 chhung inkahhai an remti a, Pakistan-a Nilaini zan dar 07:00 (India-a zan dar 06:30) atanga kalpui tan a ni.
A hmain Taliban thupuangtu chuan Pakistani-te beihna avangin civil mi 12 thiin mi 100 chuangin hliam an tuar niin a sawi a. Lehlam lehlam hi inbeihnaah hian an inhloh nasa hle niin an sawi ve ve a, finfiahna erawh a awm lo.
Kar hmasaa Afghanistan-a bomb puak atangin tharum thawhna hi intanin Kabul chuan Islamabad tihah a puh a. Taliban hian Pakistan-in mi firfiakte an beihna nia an sawi chu a dik lo niin a sawi.
Nilaini tukah khan ram pahnih hi nasa taka inbeiah an inpuh tawn zui bawk.
Pakistan sipai chuan ‘Afghan Taliban 15-20’ an that niin an insawi a, ramri district, Spin Boldak-ah hliam tam tak an awm bawk niin an sawi a. Taliban sorkar thupuangtu pawhin Pakistani sipai tam tak an thi ve tho niin a sawi.
Chawhnu lamah Kabul leh Kandahar-ah thil puak a awm leh a, a hnu darkar khat velah Pakistan hian inkahha a puang zui ta a ni.
“Inkahhai chhung hian lehlam lehlamin thil siam that dan tur an dap ang a, inbiakna awmze nei hmanga chin fel tum a ni ang,” tiin foreign office chuan a sawi.
Taliban sorkar thupuangtu pawhin Afghan sipaite chu inkahhai zah tura an tih thu leh ‘a theih chen chenah mi tibuai zawnga khawsa lo’ turin an chah tih a sawi.
Pakistani sorkar thupuanna chuan an sipaiten Kandahar province leh Kabul chu thlawhna hmangin an kap tih an sawi.
Pakistani sipai emaw, Taliban sorkar atangin emaw engmah sawi a awm lo thung a, an thupuangtu erawh chuan oil tanker leh generator a puah thu X-ah a tar lang a, Pakistan inrawlhna a sawi lang lo.
Taliban sorkar erawh chuan BBC Kabul hnenah thlawhna atangin vawi hnih kah an nih thu a hrilh a. Khawpui chungah hian meikhu dum tak hmuh tur awmin Taliban thuneituten kawtthler thenkhat an khar bawk.
Kabul-a emergency surgical chuan thil a puah hnuah hian mi 40 an danw thu leh an zinga panga hi an thi tih a sawi.
Tun tuma ram pahnihte intihbuaina hi kar tawpa ramria an intihbuai atanga intan a ni a. Taliban chuan Pakistani sipai 58 an thi niin an sawi a, Islamabad chuan ‘Taliban leh an hnuaia firfiak’ 200 chuang an thattih an sawi a, finfiahna a awm lo ve ve.
Indona avang hian China leh Russia telin, ram eng emaw zatin inbengdai turin an ngen a, US President Donald Trump-a pawhin inremna siam tura a puih theih thu a sawi.
Pakistan hian a hma atang tawhin Afghan Taliban-te hi an rama Pakistan Taliban khawia Islamabad sorkar paih thlaa Islam dan khauh tak hmang sorkar dinna tura beituah a puh a. Taliban sorkar hian a pha thung.