Pakistan ram buaiah bus-a chuang pakua kap hlum

Pakistan ram buaiah bus-a chuang pakua kap hlum
Pakistan-a ram buai lai, Balochistan province-ah Punjab province mite chu helhovin an chuanna bus tidinga an beihnaah mi pakua an kap hlum niin Zirtawpni khan thuneituten an sawi.
He thil hi Zhob huam chhunga national highway-a thleng niin Zhob Assistant Commissioner Naveed Alam-a chuan a sawi.
Helho hian Quetta atanga Lahore pan passenger phur bus hi tidingin a chuangte chu an ID card an endiksak a, pakua hruai hrangin an kap hlum a ni.
Kah hlum takte hi Punjab province-a hmun hrang hranga mite niin Alam-a chuan a sawi a. “Damdawi inah ruang pakua kan la a, post-mortem hnuah vui tura tih a ni,” a ti.
Tun hi helhovin Punjab province-a bus an beih vawi khatna a ni lo va, Balochistan-a kawngpui lian hmun hrang hrangah hetiang hian an lo che fo tawh thin.
Eng pawl mahin an tihah an la chhal lo va; mahse, tun hma lamin Baloch chi bil hel pawlte hian Punjab mite an lo bei fo tawh thin.
Hetih lai hian Quetta, Loralai leh Mastung-ah pawh mi firfiakten mi an bei a; mahse, Balochistan sorkar thupuangtu, Shahid Rind-a chuan venhim hna thawktuten pawi lian an khawih hmain an um let thei tih a sawi.
Balochistan chanchinbu thenkhat chuan helho hian province chhunga hmun hrang hranga venhim hna thawktute awmna check post, sorkar hmun, police station, bank leh inbiakpawhna tower an bei niin an tar lang a, finfiahna erawh a awm lo.
Rind-a chuan beihna hi hmun hrang hrangah an tawk ngei a; mahse, thi leh hliam an awm lo niin a sawi.
Iran leh Afghanistan nena an inrina bawra awm, Balochistan hi tun hma atang tawha hel tamna leh tharum pawh an thawh fona a ni.
Baloch helho hian venhim hna thawktute, sorkar hna thawh kal lai hmun te, tuialhthei leh ram leilung hausa tak hmuna US $ tluklehdingawn 60 zet senna tur China-Pakistan Economic Corridor (CPEC) project an bei nasa hle.
March thla khan Gwadar lawngchawlhna bul, Kalmat-ah trailer sei chia chuang hnathawktu mi panga kah hlum an ni a. February khan Punjab province-a mi bus-a chuang mi pasarih chu Barkhan-ah an kap hlum bawk.