Pakistan tana enthlatu nia hriat man
Panipat district-ah Thawhlehni khan mi enthlak hna thawk nia hriat, a thil hriat pawimawh tak takte Pakistan-a tute emaw hnena hrilhtu ni ngeia hriat ni bawk chu an man tih Haryana Police-in an sawi.
An mi man hi kum 24 mi, Nauman Ilahi niin Kairana, Uttar Pradesh a ni a. Private security guard-a thawk a nih thu Nilaini khan police-in an sawi.
“…Ilahia hian Pakistan-a mi tute emaw a bia a, thil pawimawh tak tak a hrilh thin a ni,” tiin Karnal SP Ganga Ram Punia, Panipat SP nihna chelh kawp lailawktu ni bawk chuan a sawi.
Illahi-a’n mi a biak thinte hi tute nge a nih zawhna chu Punia chuan, “Heng thil hi kan la chhui lai mek a ni a. A mobile phone kan man tel a, chhui zui mek zel a la ni,” a ti.
Illahi-a hi thla hmasaa Pahalgam-a mi firfiakte chetna a thlen hnuah India leh Pakistan sipaite inelna boruak tang tak avanga Haryana pawh a inralrin hle laia man a ni.
India leh Pakistan hian ni li chhung sipai chakna hmanga drone leh missile hmanga an inbeih hnuah Inrinni zan khan khawmual, tuipui leh van sanga inkahhai an puang a. He an inbeihna hian indona lian zawk pawh a hrin chhuah mai hlauhthawnna pawh a lian hman hle a ni.
Illahi-a man a nih hma hian Punjab Police chuan hmeichhia leh mipa pakhat ve ve, ram enthlaa chetnaa inhnamhnawih nia an hriat an lo man tawh a. Heng mite hian Delhi-a High Commission-a Pakistani thuneitu hnenah an thil hriat an hrilh thin nia hriat a ni.
Pakistan tana enthlatu nia hriat man
