Palace in Vieira an ban
English Premier League (EPL) ah 12-naa awm mek Crystal Palace chuan an manager Patrick Vieir an ban a. Eagles hian an manager thar ni tura dawr an la nei lo.
Arsenal captain hlui Patrick Vieir hian 2021 khan Roy Hodgson hmunruak luahin Crsytal Palace hi a enkawl tan a. 2021-22 season-ah beiseiawm takin inlanpui bawk mahse season kal mekah an che chhe ta viau thung. Eagles hian kum 2023 chhungin EPL-ah chak an la nei miah lova, point 33 hmuh theihna atanga point nga chiah hmuin, EPL club zingah kum 2023 chhungin an ni aia point hmu tlem an awm lo. An khelh hnuhnung pathumah Palace hian shot on target vawi khatmah an nei lo hial a, EPL-ah a chhe zawngin record thar an siam bawk.
Khelh 12 chhung ngawt an chak theih loh zawn tawh vangin table-ah an hniam duai duai a, 12-naah la awm mah se tlahniam thei dinhmuna ding AFC Bournemouth nen an inkarah point thum chiah an tla zep a, an dinhmun a him tawh bik lo hle. An dinhmun a chhiat chak em vang hian an manager Vieira leh a coaching staff pathumte an chhuahtir a. Manager thar hnuaiah chhan himna beiseiin an inlan zui ang.
Manager nei lo awm mek Crystal Palace hian Pathianni zan hian EPL-a hmahruai mektu Arsenal an hmachhawn ang.
Palace in Vieira an ban
![](https://theaizawlpost.org/wp-content/uploads/2023/03/vie.jpg)