Palak bialtu MLA atanga banga MNF zawm ta KT Rokhaw chuan opposition MLA ni chunga a bial tana kum 15 chhung a lo aupui tawh chu MNF a luh hnu ni hnih – khat chhung lekin bialin a hlawkna an hmu nghal tih a sawi.
Zirtawpnia MNF office Mizo Hnam Runa inkhawmah Congress MLA atanga banga Palak bial atang thoa MNF candidate tur KT Rokhaw chuan a bial mipuiten opposition bial nih an duh tawh loa, sawrkarna chang leh ngei tur MNF zawm lo thei a ni lo tih a sawi. “Opposition MLA ni chunga kum 15 kan aupui chu, MNF ka nih hnu ni hnih-khat lek chhungin, Health department leh School Education department ah hlawhtlinna kan hmu nghal mai a. Kei leh Palak bial mipui kan lawm takzet a ni,” a ti.
Zohnahthlakte thlamuanpui ber chu Pathian a ni a. Chumi dawtah chuan Pu Zoramthanga leh a kaihhruai sawrkar a ni, tiin KT Rokhaw hian a sawi. “Mizoram hi Zofate Jerusalem a nih theihna chhan chu sawrkar leh tlawmngai pawlten raltlante tha taka kan lo tuamhlawm vang a ni,” a ti.
Hun kal tawh a thlirin, hruaitu tha leh huaisen tan lo chuan ram hruai theih a ni lo tih MLA hlui hian a sawi a. Hun khirh leh harsa tak tak he sawrkarin tha taka a hmachhawn zel chu fakawm hlea a hriat thu a sawi. Ramri buai chungchangah silai hmetpuak ngam, raltlan thawnlet tur leh bio metrics la tura sawrkar laipuiin a tih pawh hnial ngam sawrkar chu fakawm a tih thu a sawi bawk.
“Pu Zoramthanga, mi inngaitlawm leh thinnel, nasa taka amah beitute pawh beilet ngailo mi hi hruaitu ropui a ni a. Pathianin a chawimawi zel ang. MNF party hi Pathian duhzawng anga rorel an nih avangin a sawrkar leh ngei ang,” a ti.
Palak bialin MNF-a luh hlawkna kan hmu nghal – KT Rokhaw
