Palestinian ten chhiatpui an tawh kum 76-na hriatrengna hmang

Palestinian-te chuan Nilaini khan tuna Israel atanga hnawhchhuah runpui an tawh kum 76-na chu hmangin tun thlengin harsatna an la tawk zui zel a ni.
He hnawhchhuah runpui hi Palestinians te chuan Nakba tiin chu chu chhiatna rapthlak tihna niin Palestinians 7,00,000 chuangte chu kum 1948 Arab-Israel war laiin leh Israel ram din a nih hnuah an chenna in atanga chhuahtirin an awm a ni.
Indo zawh hnuah Israel chuan an rama an let leh a phal ta lo va, a phal loh chhan chu an ram chhungah Palestinian majority an awm dawn vang a ni. Chuvang chuan Palestinians te chu permanent refugee community ni tain mi maktaduai 6 chuang te chu Lebanon, Syria, Jordan leh Israel awp mek West Bank ah te slum ang mai urban refugee camp-ah an awmkhawm ta a ni.
Israel-in Palestinians te an awmnaa an let leh a phal loh bur chu tun thlenga buaina bulpui chu la ni rengin kum 15 kaltaa inbiakna neih pawh kalpui mumal theih lohin a awm zui ta zel a ni.
Tun hnaiah Israel chuan nasa zawka beihna a kalpui mekah Palestinians te chuan kalna tur tak tak pawh an nei tawh lo va, an awmkhawmna atana Israel in hmun a buatsaihah pawh an tawt lutuk tawh bawk a, kum 1948 a thil thleng ang kha a thleng leh mek anga ngaih a ni bawk.
Kum 81-a upa Mustafa al-Gazzar chuan kum 5 mi lek a nihin central Israel atangin tuna Rafah khawpuiah hian tlanchhiattir an nih thu a sawi a. Tunah chuan tu nei duah tawhin kum 1948 aiin tuna an dinhmun a chhaw zawk ti bawkin “Kum 1948 kha chuan kan chenna a let leh theih kan beisei a, tunah chuan damkhawchhuah chauh kan beisei,” tiin a sawi.
Israel chuan a ramri a kharphui vek tawh a, Egypt chuan Palestinians tlemte chauhin an ram a luh phal bawkin a chhan chu nakin zelah refugee a ngah lutuk a hlau a ni.
Khawvel ram te chuan Gaza atanga Palestinian tam tak nawrchhuah chu an duh lo hle a, hetih lai hian Israel sorkara far-right member te chuan Palestinian te chu an duhthua pem angin an sawi tlat thung.
Gaza-a Palestinian la chambangte pawhin an chenna inah let leh ngaihna a awm tawh lo an ti bawk a, Israel in tihchhiat a ngah em avangin tun dinhmunah chuan chenna tlak a ni lo an ti bawk a. UN chuan Gaza-a chenna in te din tha leh vek tur chuan kum 2040 thleng hun mamawh a ni ang, a ti bawk.