Mizo Inchai Palian champion chotu Lalrinchhana Sailo chuan hliam vangin title fight hun sawnhlat dil mah se an pawmsak lo a, December ni 9 atanga 11 chhungin LPS Arena, Falkland-ah Inchaipui kaltlangpui a ni dawn.
Kar hmasa khan Mizo-ram Wrestling Association (MWA) hruaitute, technical mite leh media lama an thawhpui LPS Vision aiawhte’n Rinchhana’n a dar a tihnat dan leh doctor lehkha a thehluhte ngun takin an ngaihtuah a, zau zawka damdawi lama mi thiamte an rawn hnuah hliam na tak a ni lo a, inchai thinte chunga thil thleng thin pangngaiah an ngai a ni.
MWA hruaitute chuan, ‘Rinchhana dilna hi zahawm hle mah se a hun sawnhlat a nih chuan title fight dang zawng zawng pawh a nghawng vek dawn a, December kar hnihnaa inchai tura chawlh la tawhte sipai leh he hun atana kawng hrang hranga inbuatsaih tawhte vek an ni hlawm a ni,’ tiin dilna an hnawl chhan an sawifiah.
MWA hruaitute hian North Vanlaiphai tlangval chungchang an ngaihtuah laiin amah an be rawn nghal a, thla hnih hun a la awm a, thla khat chhunga a dam hman an beisei thu leh mi dang ngaihtuah chungin hun ruat tawh kaltlangpui an duh tih an hrilh a, ani pawhin a pawm thei a ni.
Kum 29 mi Rinchhana hian August thla khan champion lai Lalsangliana cho thei tur zawnnaah Lalremtluanga (Zobawk) leh Laldinthara (Zokhawthar) a hneh ve ve a, a vawikhatna’n Mizo Palian Inchai title chuh turin a tlang a, a chenna Kolasib-ah inpuahchah zui nghalin, inbuatsaihna chu hliamin atikhaihlak ta a ni.
Kum 33 mi Sangliana pawhin chhuanlam siam theihna remchang a nei a, kuminah lirtheia na taka a chetsual atanga kum khat chhung inchai lo tura tih ni mah se a vawithumna’n a title himhim turin a taksa a inpeih tawh niin a hria a, ngawrh takin a inbuatsaih.
Zan thum awh tur title fight-ah hian palaihawl champion Remruatpuia leh amah chotu Ngursangzuala, pate champion B. Lalawmpuia leh amah chotu Lalchhanhima an innuai dawn.
Nulian champion Lalhmangaihsangi leh amah chotu Zodinpuii, nulaihawl champion Elizabeth Rohlupuii leh amah chotu Penticost Lawmsangpuii Varte, nute champion Lalvenhim leh amah chotu Lalnuntluangite bakah freestyle wrestling tihhmasawnna’n exhibition match engemawzat a awm tel bawk ang.
Palian Inchai champion chotu Rinchhana dilna an pawm lo
