Palinaah India insawh nghet
19th Asian Games chu Hangzhou, China-ah neih chhunzawm zel a ni a, a ni 11 naah India chuan Gold Medal pahnih a lak belh leh a, Gold Medal 18 la tawhin palinaah a insawhnghet. Inelna thlengtu China chuan Gold Medal 159 zet a la tawh a, el phak rual lohin a sang fal ve thung.
Nilaini khan India tan Neeraj-Kishore chuan Fei khawh atangin Gold Medal a la a. He inelnaah vek hian Kishore Kumar Jena chuan silver medal a la ve bawk. Thalkaha mipa leh hmeichhe tan dung inelnaah India tana inkawp Ojas Deotale leh Jyothi Vennam ten Gold Medal an la bawk. Ti hian India hian a pumpuiah Gold Medal 18 a la tawh a, Silver medal 31 leh Bonz Medal 32 la tling tawhin medal 81 a khawl tling tawh a, 18-naah a awm mek. India hian a chung chiaha awm South Korea chu Gold Medal 14 laiin a phak lova, a hnuai chiaha awm Uzbekistan aiin Gold Medal parukin a sang zawk mek ve thung. India hian Nilaini khan Gold Medal pahnih a lak bakah Silver medal 5 leh Bronze medal 2 a lak belh bawk.
19th Asian Games thlengtu China a chungnung fal a, he thu buaitsaih lai thleng hian Gold Medal 159 zet a la tling der tawh. China in Gold Medal a lak zat hi an hnuaia awm ram hrang hrang 10 te Gold Medal lak belh khawm pawhin a phak lo hial a. An hnuai chiaha awm Japan aiin Gold Medal 126 in an la tam zawk mek.
Asian Games Hangzhou 2022 Medals Tally (Top 10)
COUNTRY GOLD SILVER BRONZE TOTAL
China 159 89 46 294
Japan 33 46 50 129
South Korea 32 42 64 138
India 18 31 32 81
Uzbekistan 12 15 21 50
Chinese Taipei 12 10 18 40
Thailand 10 10 19 39
DPR Korea 7 10 6 23
Bahrain 7 1 4 12
Hong Kong 6 15 24 45
Palinaah India insawh nghet
