Paragliding Championship
chungchang sawiho
December 9-14, 2024 chhunga Serchhipa neih tur International Paragliding Accuracy Championship & Air Sport Festival chungchang thlirhona chu nimin khan Serchhip DC Paul L.Khuma leh Tourism Director R. Lalrodingi hovin Serchhip DC Meeting Hall-ah neih a ni.
DC Paul L.Khuma chuan Serchhip District chhunga Head of Office te, khawtlang leh tlawmngai pawl hrang hrang hruaitute nen meeting nei a, hmalak dan tur an lo rel tawh te leh an hmalak mek dante a report a. Tihtur an bitukte tha taka an hlenchhuah avanga lawmawm a tih thu sawiin he Championship hi tluang taka an neih ngei a beisei thu a sawi.
Tourism Director R. Lalrodingi pawhin Serchhip District chu model district an nih thu leh DC hoa an hmalaknate Tourism-in an rintawk thu a dawn avangin Tourism Department chuan an ngai pawimawh em em a, Tourism Minister pawhin hemi chungchangah press meet a ko dawn tih a sawi bawk.
December ni 9, 2024-ah pilot te tan inziahluhna hun leh a tul tul inbuatsaihna hun neih a ni ang a. December ni 10-ah inelna neih tan a ni ang a, Serchhip DC Paul L.Khuma chu khuallian niin he hunah hian pilot intihsiaka tel te a vai liam dawn a ni.
Tun dinhmunah Federation Internationale Aeronautique (FAI) kaltlangin ram 14 atangin pilot 79 an in-register tawh a. Serchhipah mi 8 an lo thleng tawh a ni.
a chhimtu mipuite tan paragliding tandem flight neih tan mek a ni tawh a. Hot Air Balloon a chuan theih a ni dawn bawk a. He Championship denchhen hian December ni 14 tlaiah Concert buatsaih tum a ni a. Air Sport Festival neih chhung zawng hian ei tur chi hrang hrang te, handloom te, thei leh thei tui te, dil sangha man thar leh thil dang zawrhna tur stall 15 siam a ni dawn a. Paraglider te tumna tur landing site, Zawlpuiah Nghakuai Chiah Runpui buatsaih a ni dawn bawk a ni.
Kharna inkhawm hi Mizoram Chief Minister Lalduhoma, Serchhip bialtu MLA ni bawk hovin December ni 14-ah neih a ni bawk ang.
Paragliding Championship chungchang sawiho
