Paralympics an tan ve leh ta
Summer Olympic Games a zo a, a hmun ngai Paris-ah bawk pianphunga harsatna leh piansualna neite intihsiakna lian ber Paris 2024 Paralympic Games chu Nilaini zan khan opening ceremony ropui tak nen tan a ni.
Opening ceremony hi Olympic Games hawnna ang khan Seine luipui chungah nghah a ni ta lo a, Paris khawpui lailia awm Champs Elysees kiang hnaia Place de la Concorde an tih hmunah nghah niin, luipui chungah ti bung bung lo mah se tun kha stadium pawna Paralympics hawnna hun an buatsaih vawikhatna a ni ta tho. French president Emmanuel Macron chuan Paralympic Games a hawng a; programme mit la tak taka chhunzawm a ni.
Opening ceremony lai khan venhimna lam paw an uluk leh hle a, a hmunah dan kengkawngtu officer 15,000 zetin an thutchilh.
Paris 2024 president Tony Estanguet chuan thu sawiin, “Infiammi duhtakte u, hmangaihna leh helna (revolution)-in a tuam tawh ram hian a lo lawm a che u,” tiin infiammite chu lung muang taka awm turin a chah a, tunhma an rama helna rapthlak pui pui hnuaia lu tanna khawlte kha hmuh tur a awm tawh loh thu leh thil tha zawk duha harhtharna/helna duhawm ber paralympic revolution a vul mek tawh zawk niin a sawi.
Thusawitu dang International Paralym-pic Committee president Andrew Parsons chuan thei lo nia inngaihna bangpui thiahsak tawh rualbanlo (persons with disabilities)-te chuan Paris 2024 Paralympic Games-ah hian an theihna sang ber an entir dawn a ni,” a ti ve bawk.
Thla hmasa Seine River-a Olympics opening ceremony kha ruahsurin a tibuai hle a; Leonardo da Vinci lemziak ‘The Last Supper’ diriamna ang deuha an lemchanin titi lian ber a luah bawk.
Paris 2024 Olympic Games opening ceremony angin kristian-te deusawhna lam rawngkai hmuh tur a awm ta lo a, harsatna dang pawhin a tlakbuak lo a; Canadian musician, songwriter leh producer ni bawk Chilly Gonzales-a piano tumna hnuaiah live show tan a ni.
Entute thutna 50,000 an siam chu hralh fai vek niin, Swedish choreographer Alexander Ekman-a hoa artist 500 rual inlan chuan mit a titlai a; rualbanlo artist rual inlan bawkin, French singer Christine leh Queens lamin ‘Je ne regrette rien’ an thlawh bawk.
Champs Elysees hnuai atangin ram 168 atanga infiammite’n athletes’ parade an tan a, volunteer rualin khuangte leh lamin an lo tawiawm!
Ningani atanga ni 11 chhung awh tur inelna tan tak kha France-in summer Paralympic Games a thlen vawikhatna niin, Paralympic sport chi hrang 22-a inel turin ram (contingent) 168 an inlan kal mek a, kumin hi chhuak ram an tam ber tum niin, infiammi zat belhkhawm pawh 4,400 zet an tling a, chu’ng mite chuan Paris khuaah gold medal 549 an inchuh mek a ni.
Paralympics an tan ve leh ta
