Olympic tennis competition chuan player hmuhnawm leh langsar dang a chan belh leh a, women’s third seed Elena Rybakina chu Romania aiawh Jaqueline Cristian nen singles first round-a intum tur an nih laiin a inhnuhdawh thu hriat tur a awm ve leh thut a, a chhan erawh tarlan a ni lo.
Big-serving Kazakh hi Roland Garros tournament-a gold medal awrh beiseiawm zinga tel ni mah se a inhnuhdawh thu hi organiser lamin an puang a, mixed doubles lama a chipui Alexander Bublik nena inkawp tur an nihna pawh hnuhdawh zui nghal a ni.
Kum 25-a upa Rybakina inhnuhdawh tak avang hian France player Caroline Garcia chuan 17th seed niin draw-ah Kazakh hmun a luah a, Australian Daria Saville chu draw-a hmunawl awm hnawhkhattu a ni ve thung.
Vawiin atanga Parisian clay-a khelh tan tur Paris Olympic tennis inelnaah hian player langsar inhnukdawk an indawt chho zut a, Nilaini pawh khan men’s world number one leh top seed ni bawk Jannik Sinner of Italy chu tonsil na avangin singles leh doubles-ah a inhnukdawk a; kha mi ni vek khan Danish youngster Holger Rune pawh banrek na avangin draw felsa diam tawh atanga thaichhiat a ni.
Olympic silver medallist Marketa Vondrousova pawh a kut na an zai avangin Paris 2024 Games atangin a lo kalkiang tawh a, Tokyo 2020-a a medal dawn chhunzawm turin kum li dang a nghah leh rih a ngai dawn ta a ni.
Czech kum 25 mi hian tunthla tir lam khan Wimbledon title humhim tura a beih bultannaah first-round a paltlang zo lo a, kha result avang khan kum 1994 daih tawh first round-a Spaniard Jessica Bouzas Maneiro hneh loa tlawm Steffi Graf hnu lama Wimbledon ladies singles champion lai first round paltlang zo lo hmasaber a nih phah.
Vondrousova hian Instagram kaltlangin tun summer Games-a a inlan theih loh tur thu a tarlang a, August ni 26 atanga khelh tan tur US Open atana insawrbing a tum thu a zep tel.
Paris-ah hian tel thei dawn se 12th seed a ni dawn a, mahse, Czech team-a a hmunruak hi Katerina Siniakova chuan singles bikah a luah a, doubles-ah Linda Noskova chuan a thlak ve thung.
Vondrousova bakah hian world number three Aryna Sabalenka, Tunisian Ons Jabeur leh Briton Emma Raducanu-te chu Paris women’s event-a tel lo tur langsar zualte an ni.
Swiss player langsar leh Tokyo Games-a champion Belinda Bencic pawh kumin April thlaa fanu a hrin avangin a la chawl a; Ningani draw hma lawk khan two-time Olympic singles champion Andy Murray pawhin singles khel tura a fit loh thu sawiin, doubles lamah erawh Dan Evans nen an inkawp thei hram dawn.
Mipa lamah hian Polish world number 7 Hubert Hurkacz pawh inhnukdawk langsar niin, kum 27 mi hian khup hliam avangin Wimbledon second-round match kha a khel zo thei lo a, Olympic lamah pawh a inlan thei dawn ta lo a ni.
Paris-a kan hmuh loh tur langsar leh deuh dangte chu American Ben Shelton leh Tokyo men’s bronze medal winner Pablo Carreno Busta of Spain-te kha an ni.
Paris 2024 tennis inelna a\angin Rybakina inhnukdawk ve leh
