New Zealand women’s football team lamin complaint an siam a, Thawhtannia an training session chu Paris Olympic Games 2024 women’s football tournament Group A lama an tumpui pakhat Canada staff member ‘drone’ khalhin a tibuai tiin FIFA lamah an zualko a, he mi nghawng kal zelah hian Canada women’s football manager Bev Priestman chuan opening match bika team enkawl lo turin thutlukna a siam a, a hnuah an tumpui turte inbuatsaih dan enthlak rukna (spying scandal) avang hian head coach Priestman bakah assistant coach Jasmine Mander leh team analyst Joseph Lombardi-te chu Games atanga thawn haw an ni!
Nilaini khan Canadian Olympic Committee (COC) chuan Olympic squad atangin an staff member pahnih an hawtir tih an sawi a, he’ng an thawn haw pahnihte hi Tokyo Games-a gold medallist ve ve niin, Ningania New Zealand an hneh tumin head coach Priestman pawhin team a enkawl lo.
Hetih mek lai hian French court pakhat chuan Ningani khan Lombardi zawk hi thla riat chhung jail tang tura tih a nih thu leh a lung in tan tur erawh jail luh ngai lo chi a nih thu an lo puang ve mek a, a thil neih erawh khawihchet theih loha dah a nih thu an sawi.
Kiwis team training session hi Canada coaching staff lam hian drone hmangin an lo enthla ru niin New Zealand Olympic Committee chuan an puh a, FIFA lamin kum 38 mi Priestman bakah an thawn haw tak pahnihte lakah hian eng hremna nge a pek dawn hriat theih a la ni rih lo.
Report a luh hnuah Canadian football federation lamin assistant leh analyst an hawtir phawt a, nimin mai khan head coach Beverly Priestman pawh chu Olympic kal mek atana Canada women’s football team manager a nihna an hlihsak ve leh ta.
Tarlan tak angin, kum 38 mi English thisena piang Priestman hian a ma duh thu ngeiin Ningania Olympic bul an tannaah khan team a enkawl lo a, a tel loin Canada chuan sihnih faiin Kiwis an hneh a, a hnu lawkah Canada Soccer chief executive Kevin Blue chuan Olympic match khelh tur hmabak an la neih zawng zawngah pawh Priestman an chhawr zui dawn lo tih a puang a, assistant coach thawn haw loh zawk Andy Spence chuan Paris-a an cham chhung zawng head coach hna a chelh zui dawn ta a ni.
Paris atangin Canadian pathum an thawn haw!
![](https://theaizawlpost.org/wp-content/uploads/Clipboard01-1975.jpg)