Athletics chu sport hrang hrang zingah Olympic champion-te tana tangka fai (prize money) pechhuak hmasabertu an ni dawn tih Nilaini khan puan a ni.
World Athletics president Sebastian Coe chuan kumin Paris Games-a track leh field gold medallist 48-te hnena US dollar 50,000 (£39,400) theuh pek an nih tur thu hi khawvel hriatah puangin, silver leh bronze medallist-te pawhin prize money thahnem tak an la dawn vek tur thu leh chu erawh 2028 Los Angeles Games atanga pek tan tur a nih thu a sawi a, a zat tur erawh la puan chian leh tur a nih thu a tarlang tel.
Sebastian Coe chuan International Olympic Committee atanga Olympic Games atana World Athletics-in sum a dawn zawng zawng chu a bo-a-bang awm loa athletics tana an hman zawh vek tur thu leh tuna Olympic gold medal awrhtute tana sum fai an pek tur pawh hi kum 2015 atang daih tawha an lo ruahman leh mitthla thin a ni thu a sawi.
Coe hian Paris Games-a lawmman semchhuah tur atana US dollar maktaduai 2.4 (£1.9m) zet an dahthat khiau tawh thu a tarlang tel bawk.
Relay team member-te chuan gold medal ken tel pawisa hi an insem dawn a ni.
Briton Coe kuta kum 1980 leh 1984 Games 1,500 metres gold medal a luh lai khan Olympics chu official-in amateur-te inelna a la ni a, athletics pawh chu tho chu la niin, tunlaiah erawh Olympic Games-ah hian professional infiammite pawh an chhuak thei tawh a ni.
Coe hnu lawkah khan Olympic-a athletics inelna chu professional huanga leh chhoh ni mah se Olympic-ah prize money inpek a ni ngai lo a, infiamna tam taka athlete-te chuan sponsor atang leh an ram sawrkar atangin sum tamtak an huilut thin thung.
Athletics hi a chhuak tam lam leh TV atanga thlirtu zat atanga tehin Olympic-a sport lian ber a ni kumkhua a, mahse, Olympic medallist tam tak telin athlete tam ber chuan inbuatsaihna kalkawnga puitu tur sum (funding) hmuh kawngah harsatna an tawk bang thei lo.
Tunah khawvel huapa athletics khaikhawmtu pawl lian ber World Athletics lamin Olympic Games-a prize money semchhuaktu international federation hmasaber an nih tur thu an puang a, kumin Paris Games-ah gold medal awrhtute tan chauh tangka hi pek ni rih dawn mah se Los Angeles 2028 atanga silver leh bronze medallist-te pawhin prize money an dawn tur thu an sawi a, infiammite tan an kal zelna turah kawl a eng zual dawn niin a lang.
International Olympic Committee lam chuan prize money chungchanga World Athletics thupuan hi an thuchhuah an la siam lo.
Paris Games-ah track leh field gold medallist an nihlawh dawn
