Jakarta khawpuia Asia Olympic Quali-fiers-ah Inrinni khan Vijayveer Sidhu chuan men’s 25m rapid-fire event-ah silver medal kap chhuakin kumin Paris Olympic Games-a India quota 17-na a luah chiah.
Kum 21-a upa Sidhu hi nikum Hangzhou Asian Games-ah pawh khan bronze-medallist team zingah tel tawhin, 25m rapid fire kaltlanga Paris thleng tur a senior country-mate Anish Bhanwala hnung a zui ve leh ta a ni.
Anish hian nikum khan South Korea rama Changwon khaw Asian Championship-a bronze medal awrh chungin Olympic quota a lo sualchhuak tawh a ni.
Inrinnia finalist paruk zinga palite khan Paris quota an chang a; Chandigarh tlangval Vijayveer Sidhu tluk loh Kazakhstan shooter Nikita Chiryukin kutah gold medal a lut.
Rapid-fire pistol hi India chetthatna a lo ni tawh hrim hrim a, 2012 London Olympic Ga-mes-a Vijay Kumar-a silver awrhna kha a ni.
2020 Olympics hma khan a chunga hming tarlan Indian shooter Anish khi Tokyo thleng tura rinkai lawk zingah tel mah se New Delhi khuaa ISSF World Cup 2021-ah khan a bawh-pelh ta hlauh a ni.
Paris Olympic-a inlan turin Vijayveer leh Anish an tlang ta ve ve a, rapid-fire shooting bika Indian kan hmuh dun tur hian India medal table-ah awmzia nei zo tak ang maw?
Indian shooter-te zinga Jakarta intihsiak kaltlanga Paris Olympics quota pali changte chu Esha Singh (women’s 10m air pistol), Varun Tomar (men’s 10m air air pistol), Rhythm Sangwan (women’s 25m sports pistol) leh Vijayveer-te hi an ni.
Paris Olympic-a inlan tur shooter Sidhu
