Kum 37 mi ni ve tawh Andy Murray chuan 2024 Paris Olympics zawh rual hian tennis inelna bansan ve tawh a tum thu a nemnghet.
Paris Games hi Briton tan Olympic-a vawinga a inlanna tur niin, singles leh doubles-ah a chhuak ve ve dawn a, chu mi atana inbuatsaihna a kalpui mek laiin social media platform X-ah a chawlh hun tur tarchhuakin, “Ka tennis tournament hnuhnungber hmachhawn turin Paris ka thleng a; Team GB tana khelh hi ka career-a chhinchhiahtlak ber ber ni thinin, ram tana khel chunga ka hun hnuhnung ka thleng thei tur hi ka inchhuang hle a ni,” tiin.
Scot tan 2008 Beijing kha a Games hmasaber niin, first round-ah straight sets hmangin Lu Yen-hsun a hneh lo phawt.
Kum li hnuah Wimbledon final-a a ngam loh Roger Federer hnehin London 2012-ah khan gold medal a sualchhuak ta a ni.
Rio 2016-ah champion lehin, kha vang khan Briton hi mipa tennis player zinga Olympic singles title pahnih la thei hmasaber niin, Brazil ram Olympic singles final-ah khan Argentina star Juan Martin del Potro a hneh.
Grand Slam singles title pawh pathum la tling ve tawh Murray hi January 2019 khan a khel bawr na zaisak niin, tennis a chawlhsan phah hial thei dawn nia a lan hnuah inelna rawn hmachhawn leh thei bawk mah se a inzai hma kha a pha thei tak tak tawh lo a, vawihnih a champion tawhna Wimbledon-ah pawh tunthla tir khan doubles-ah inlanin a unaupa Jamie nen first round an paltlang zo lo a, SW19-a a inlan tawpna a nih tur thu a sawichiang tawh nghe nghe.
Kumin Wimbledon pawh kha hnung na avangin a khel thei lo tep a, singles-ah phei chuan a inhnuhkdawk a; Paris-ah hian Olympic tennis singles gold medal vawithum la thei awmchhun ni turin a fit tawk turah ngai phawt ang.
Olympic gold medal pahnih baka Olympic medal dang pakhat (mixed doubles silver @ London Games) awrh tawh bawk Scot Murray hi British number three Dan Evans nen doubles-ah an inkawp dawn a; Paris-ah hian singles leh doubles-ah chiah a chhuak dawn ta a ni.
July ni 27, Inrinni atang hian Roland Garros lamah tennis opening round an tan dawn a, August ni 2 atangin medal round an khel tan ang a, August ni 4-ah an zo ang.
Paris Olympic zawha chawl tur Murray
![](https://theaizawlpost.org/wp-content/uploads/tap_logo-min-large.jpg)