Europe-a bil leh tlat thin Paris St-Germain chuan Parc des Princes-ah tlawm an pumpelh hram a, hun pekbelh minute riatna a kal mek laia Kylian Mbappe penalty sawihlawh chhuihluh hmangin Newcastle United lakah 1-1 draw an sualchhuak thei hram a, Champions League knockout stage luh an tumna kawngah an dinhmun a derthawng.
Hun tawp dawna spot-kick hi ball cross a danna lama Tino Livramento kutin ball a tawkfuh vanga ham a ni a, referee Szy-mon Marciniak chuan thutlukna a siam hmain ‘pitchside monitor’ a thlir zet a, video assistant referee endikna hnuaiah penalty ham a ni a, last minute tak taka penalty hian sawi zui a hlawh hat a, Premier League club tan a na duh khawp awm e!
Eddie Howe team zinchhuak hian Paris khuaah goal an lawm hmasa zawk a, first half minute 24-a Aleksander Isak-a goal hmangin hnehna an sualchhuak dawn niin a lang hman a, mahse, penalty nunrawng hmangin away-ah point hnih an hloh then ta a ni.
Hmahruaitu zawk an nih hnu khan Magpies-in goal venhim lam an buaipui zui char char a; Newcastle goalkeeper Nick Pope a langsar a, pui taka Bradley Barcola leh Mbappe goal tur a dansak hnu hun tawp dawn penalty erawh a dang zo ta bik ngang lo a ni.
France rama an point khat hlawhchhuah hmangin Newca-stle chuan Group F table mawngphah thawhsanin pa-thumna an luah chho a, point hnihin an chung chiah luahtu PSG nen an inthlau.
English team hian last 16 lut turin an group match hnu-hnungberah AC Milan an hneh phawt a ngai a, tah mai chuan a la tawk zo lo a, tlang tawh Borussia Dortmund leh PSG a pawimawh tel bawk ang.
Paris tlawm tur chhantu Mbappe penalty
