Parliamentary building thar chung phui lo avanga tui put lai video thehdarh a nih hnuah Samajwadi Party chief Akhilesh Yadav chuan rorel lai BJP te a nuihsawh hle a. Tun hnaia Delhi-a ruahsur nasa tak avanga mi pakua laiin nunna chan phah leh khawpuia tui a tlin hmer hmur karah parliamentary building thar chung pawh a far a ni.
Akhilesh Yadav chuan parliamentary building thar kawtzawl tihlanna leh a hnua domed glass roof farnaa bucket pawl dah a nihna a pholang a, parliamentary building thar sak nan hian Rs 1,000 crore dawn sen a ni.
“Parliament building hlui zawk kha a thar aiin a tha fe zawk. Rupees billion tel senna parliamnet building thara tui a far reh hma chuan building hluiah insawn rih mai ila,” tiin Akhilesh chuan a sawi a.
Yadav chuan BJP te chu nuihsawhin ‘mipui ten he sorkar hnuaia inchung thar sak zawh apiangah tui a far em ni an ti a, hei hi design zinga tel em ni an ti’ tiin a sawi bawk.
He video avang hian opposition figures Trinamool Congress Lok Sabha MP Mahua Moitra leh Congress MP Manickam Tagore te pawhin BJP te chu tihel nan an hmang bawk a.
“Parliament lobby tharah tui a put” tiin Moitra chuan post-in Lok Sabha inthlan BJP te election result nen a tehkhin bawk a. Saffron party te chuan April-June poll neihah khan seat 400 lak tuma an beih laiin majority pawh an nei pha lo a ni.
Tagore thung chuan NEET-UG medical course entrance tests exam paper leak nen khaikhin thungin, “Pawn lamah paper leak, chhung lamah water leak” a ti ve thung.
“Parliament lobby President-in a hman meka water leakage awm hian he building tharin rang taka tui putru tihtawp dan a mamwh zia a lang a ni” tia sawiin he mi chungchang hi Lok Sabha session-ah sawiho tura a ngen tur thu a sawi bawk.
Delhi-a rorel mek Aam Aadmi Party te pawhin “Rs 1,200 crore senga sak Parliament building chu Rs 120 man bucket-ah a innghat mek,” an ti bawk.
Sorkar chuan sawi a la nei lo thung a. A hma lawkin Delhi leh varanasi inkara tlan vande Bharat train chung atangin tui a put tawh bawk a, hei hi passenger-in video-a lain thehdarh a ni bawk a. Northern Railway te chuan sawifiahna nei nghal thungin pipe a thil inhnawh vang an ti thung.
June thla khan grand Ram Temple, kumin January thlaa ropui tak Prime Minister Narendra Modi an a hawn taka sanctum sanctorum or inner chamber-ah tui put a awm tia sawi a ni tawh bawk a. Chief priest Acharya Satyendra Das pawhin tuichhe paihna a tlem tiin a lo sawi tawh bawk.
Mahse temple administrative officials te chuan sawifiahna siam nghalin second floor sak mekah electric wires install-na tura pipe-ah ruahtui a lut mai rih a ni an ti ve thung.
Parliament building tharah tui pút
