Parliamentary Standing Committee on Health & Family Welfare member, Lok Sabha MP C Lalrosanga chuan Mizoram leh hmarchhak state hrang hranga Central Government Health Scheme hman dana duhkhawp lohna a sawichhuak.
Parliamentary Standing Committee on H&FW hi Ningani khan New Delhi-ah an thukhawm a. C Lalrosanga hian Mizorama sawrkar laipui hnuaia thawk leh pension tawhten an dam loh nikhuaa private damdawi ina Central Government Health Scheme (CGHS) an hman a, an hlawkpui ve theihna tura ruahmanna siam rang turin Health & Family Welfare ministry a ngen. CGHS hmang hian sawrkar enkawl loh damdawi in dangah pawh man tlawm zawka damlote enkawl an nih theih nan CGHS huamtir (empanel) a ngai a ni, tiin, hmarchhak biala sawrkar hnuai ami ni lo damdawi in ten he scheme hi an hman duh huna empanel an nih nan CGHS hnuaia damlo enkawlna leh damdawi mante tipung tura ennawn a tul tih a sawi.
Hmarchhak biala sawrkar laipui hnuaia thawk laite leh pension tawhte Guwahati AIIMS damdawi ina sumfai pe loa enkawl an nih ve theihna tur, cashless facility ruahman tura thuneitute nawrin, CGHS atanga damdawi pekchhuah thenkhat a tha tawk lo chu damdawi tha chauh leia pechhuak thin turin sawrkar hotute chu a ngen a ni. Hmarchhak state zingah CGHS Wellness Centre la awm lohna Arunachal Pradesh khawpui Itanagar-ah pawh din ve thuai a tul tih a sawi bawk.
Hriselna enkawl chungchanga Parliamentary Committee thutkhawmah hian member dang MP-te bakah Health & Family Welfare ministry hnuaia secretary leh hotu dangte an tel a ni.
Parliamentary Committee hnenah health scheme duhkhawp lohna sawi
