ZPM party chuan party dangin an neih ve loh ‘leader’ an nei a, central sawrkar dawr tura pawha duhthusam a ni, tiin, MLA C Lalsawivunga chuan a sawi.
Thawhtanni hian ZPM inkhawmah Aizawl South I bialtu MLA hian party dang neih ve loh leader an nei a, a kaihhruaina hnuaiah ZPM-in sawrkarna a chang a nih chuan kuthnathawktute thawhrimna leh thawhhahna ten awmzia a nei tawh anga, beidawnga awm mekte, beiseina pawh nei ngam tawh lo ten beiseina thar an neih theihna turin kalphung thar mipui sawrkar siamtu zingah hawkhawm a ngai tih a sawi.
India danpui hnuaiah central sawrkar leh state sawrkar chu inthlunzawmna mumal tak hnuaia kal an ni, tiin, “Keini ang state pachhe tak tan chuan leader tha neih hi a tul lehzual a; central sawrkar dawr tur pawha duhthusam chief ministerial candidate ZPM-in kan nei hi kan vannei hle,” a ti.
Tunlaiah ZPM chu social media-ah, inkawmhona hmunah leh khawlai titi-ah a lar hle a, chirhthehna chi hrang hrang tawkin nasa takin beih mek a ni tih C Lalsawivunga hian a sawi a. Kalphung thar mipui sawrkar din tura ZPM inbuatsaihna chu mipui lamin a taka chantir an tum mek tih a sawi.
Eng kawngah mah intodelh loa kan awm mekna ata chhuak a, Pathianin leilung hausakna min pek a taka haichhuak a, intodelna lamtluang huaisen taka zawh turin ngaihtuahna siam thar a hun tih MLA hian sawiin, “He ram hian chief minister tha, Pathian tih mi neih kan phu a. Chief minister tha lo hnuaiah chuan mithiam tak tak pawh engmah ti thei loin an thu thuap mek a ni. Retheih huama kan ram tana beitu ZPM leader Pu Lalduhoma hruaina hnuaiah rorelna tha tundinin a awm ngei ang tih ka ring a ni,” a ti.
Party dang neih ve loh leader kan nei – C Sawivung, MLA
