Party muthlu inkaitho

An tlin leh tlin loh chu thuhran ni se, Dampa bial by-election lo awm turah Congress party an phur a, muthlu an inkaitho mek nia ngaih a ni.
Mizoramah 2008 atanga 2018 thleng khan an sorkar a, chumi hnu chuan an zuai ta hle tih hi phat rual a ni lo ang. 2024 inthlanah phei chuan an boruak a chiri a, politics ngaihven lem lote pawhin Congress party 2023 hnuah pawh an zuai tih hi an hai lo ang.
Dampa bial by-election lo awm turah hian an boruak a nung ta riau a, an party mi, lo muthlute pawh an harh thar; neutral an nghawng em tih chu thuhran ni se, party chhungah chuan a hma aiin an harh nia ngaih a ni.
“Party kan phur a, kan unit te an phur a, kan campaign office-te pawh a lun a. Kan party atanga lo chhuak tawhte pawh an lung a leng thar a,” tiin Congress campaigner pakhat chuan a sawi.
“Kan phur khawp mai; Congress party atanga lo chhuak tawhte pawh an rawn let a, kan party mite an phur tih hi hai rual a ni lo,” MPCC adviser Zodintluanga Ralte, minister hlui pawhin a ti.
Dampa bial inthlan lo awm tura Congress candidate John Rotluangliana hi thawm nei chi a ni a, khawthlang lamah hmelhriat thian tha a ngah. Lokichera bialtu MLA a lo ni tawh a, Mamit bialah vawi hnih a tling tawh bawk. Khawthlang lam a hre chiang a, Congress party chhungkua pawh a hre chiang nia sawi a ni.
“Bial chhunga Congress hruaitute bakah Congress-a lo awm thin, party danga awm tate thlengin a hria a. Hei hian awmzia a nei khawp mai,” Congress campaigner pakhat chuan a ti.
2023 inthlan thlengin Congress atangin mi engemaw zat an chhuak a, thu dawn danin, chung mite huikhawm hna chu an candidate hian theihtawp chhuahin a bei a, hei hi muthlu an inkaihthawh dan pawimawh a ni. He bial hi Congress party that thinna a ni a, tunah an tha ta lo a nih pawhin Congress-a awm thin mi thahnem tak awmna a nih avangin bial dang thenkhat ai chuan inkaihthawh a awlna tur a ni ve bawk.
An tling ang em tih lam chu thuhran ni se, Congress party hi a hma aiin an phur a, a hma aiin party chhungah an harh. Chutih rual chuan Dampa bial inthlan lo awm turah hian politics boruak a nung hrim hrim a, party dang pawh an nung ve tho.