West Bengal assembly deputy speaker hlui, Asish Banerjee-a chu Pathianni tuk khan Birbhum district-a Rampurhat khawpuia an chenna in bul maia an party, Trinamool Congress (TMC) pisaah inawk hluma hmun a ni a, a ruang hi postmortem tur a ni.
Mamata Banerjee-i hova TMC-in ro an rel lai khan Banerjee-a hi deputy speaker a ni thin a, Rampurhat bial atangin vawi nga MLA-a thlan a ni tawh.
A ruang bula kutziak lehkha chhar a ni a. “He thihnaah hian mi dang tumahin mawh an phur lo,” tih a inziak niin tual chhung mite an sawi.
Banerjee-a hian politic a khel chu a inchhir thu leh a chhungte pawh khel lo turin a chah niin sawi a ni a. Ei ruknaah a inhnamhnawih loh thu leh an party-in ‘thil dik lo’ a tih pawhin a tel ngai lo va, a hnial thin tih a ziak bawk nia sawi a ni.
Tarapith Rampurhat Development Authority (TRDA)-a ei ruknaa an puhnaah pawh a inrawlh loh thu a sawi bawk.
“TRDA-ah hian general meeting-a ka tel bak engmah inrawlhna ka nei lo va. Tender committee-ah pawh ka tel lo va, cheque-a hming ziak turin thuneihna pawh ka nei lo va, ruahmanna pawmnaah leh ‘no objection’ certificate tihchhuahah pawh ka inrawlh lo va. Tumahin he thilah hian min rawn lo va. Vawiin hian politic kha khel kha ka tihsual niin ka ngai a, ka chhungte pawh khel lo turin ka ti duh a ni,” tiin a inziak.
Kumin kum tira an state inthlanah khan BJP candidate Dhruba Saha lakah a chak lo.
Rampurhat-ah hian Hattalapara vengah a cheng a, an party pisa chhunga a ruang hmuh a nih hian mi tam tak an pungkhawm nghal.
Banerjee-a hi Bengal-ah hian education leh agriculture minister pawh a lo ni tawh.
June thla khan TMC Birbhum district core committee chairman a nihna atangin a bâng a, an party erawh a chhuahsan lo.
An state inthlanah khan Birbhum-a bial 11 awma parukah BJP an chak a. Kum 2021 kha chuan TMC-in bial 10 changin BJP-in bial khat chiah an chang.
Party office-ah Bengal dy. speaker hlui a inawk hlum
