Party office atan Assam Rifles biak in kan sawi ri tel ngai lo – ZPM president

ZPM office tur zawnnaah Assam Rifles biak in an sawi ri tel ngai lo hrim hrim tih ZPM president Lalliansawta chuan a sawi.
Thawhtannia ZPM office-a inkhawmah party president Lalliansawta chuan, tunhnaia Assam Rifles biak in, party office atana chhuhsak tuma mi thenkhatin an puhnaah, party office hmun atan Assam Rifles biak in chu a sawi pawh an sawi ri ngai loa, an inrawlh loa, an inrawlh ang zawnga thu tithangtu, mipui rilru hruaikawi tumtute chu ZPM party chungah ngaihdam dil turin an phut tih a sawi.
“Sawrkarna kan han chang a, party office nei lo ta chu, party office neih a tul thu kan sawi fo a; kan hotute rilruah hual sa leh biak mek pawh kan nei. Assam Rifles biak in saw kan sawi ri ngai lo hrim hrim a. Hei hi Zoram mipuiin min hriatpui se ka duh,” a ti.
Assam Rifles chu lo insawn chhuak ta pawh nise, biak in hmun aia hmun tha leh remchang zawk hmun tam tak beisei tur a awm ngei dawn tih ZPM president hian sawiin, “Chutiang pawh ni si loa mi rilru hruaikawi tuma thenkhatin hetianga politics-a inbeihnan an hmang duh hi a pawi hle a, tunlai khawvel changkang tawhah dawt chu awlsam taka laihlan leh mai theih a nih tawh avangin dawt sawi hi a tlo lo a ni,” a ti.