Dampa bial by-election chungchangin politics ngaihvente titi a luah der tawh a, mahse MNF, Congress leh BJP te’n an party candidate tur chungchangah thawm an la nei lo.
ZPM-in candidate tur an puang tawh a, eptu pawlte erawhin candidate tur thlangtu tur nomination committee pawh an la din lo.
Dampa biala tha thin Congress party chuan tun karah emaw kar leh lamah emaw nomination committee an din a rinawm tih thu dawn a ni.
Congress party-ah hian candidate atana chiang sa an awm hran lo a, mipui hriat tura hming han ri pawh an awm chiah lo. He bial MLA lo ni tawh an nei a, ani hming hi a ri chuang lo. Minister hlui pakhat hming han ri deuh chu a awm.
2023 inthlanpuia Congress party candidate Lalhmingthanga Sailo chu kar hmasa khan Congress party atang hian a chhuak a, ani hi party dang candidate a ni dawn em tih hriat a ni lo. Tun hnaiah Dampa bialah Congress party atanga chhuak an awm a, Congress Bhavan atanga thu dawn danin, anni hi Lalhmingthanga Sailo thuihruaite an ni a, ZPM atanga Congress zawmtu an ni tlangpui.
Dampa bialtu MLA a nih laiin July ni 21 khan Lalrintluanga Sailo, MNF party chu a boral a, an party hian candidate tur thlangtu tur nomination committee an la din lo.
Hnam Run atanga thu dawn danin, July ni 27-ah Assembly Session-ah an sun dawn a, chumi hmaa nomination committee lo din chu hma an tih deuh avangin, kar leh lama din an tum.
MNF-ah hian minister hlui Dr R Lalthangliana hming a ri a, mipui titi-ah pawh a hming hi a lang.
BJP-in candidate tur an dap mek a, thawm nei lovin an party candidate tur hi an ngaihtuah mek tih thu dawn a ni.
2023 inthlanpuia party dang candidate pakhat chu BJP candidate ni thei a ni tih thu dawn a ni a, thu chiang erawh a la awm lo.
Party pathumte’n thawm la nei lo
