Inthlanpui lo awm tur atan political party-te an
inbuatsaih mek a, an hnapui chu candidate tur thlan fel a ni. Party liante chu hemi-ah hian an inpeih fel tan.
ZPM-in bial 40-a candidate tur an ruat fel tawh a, inthlakna hun chu la awm tho mah se ‘final’ tawhah ngaih a ni. MNF-in a hmawr an bawk hnai a, Congress party pawh an inpeih titih tawh.
Inrinni khan MNF party Nomination Committee an thu a, tun karah thut leh an tum. Thawhtanni khan Congress party Nomination Committee an thu bawk.
MNF hian MLA 27 an nei a, an MLA Dr K Beichhua an chan avangin, bial awl 12 nei tur khan bial awl 13 an nei. Heng bial awla ding tur hi, a tam zawk chu an tifel titih tawh tih thu dawn a ni.
MNF bialah chuan home minister Lalchamliana bial Hrangturzo-a ding tur a la chiang lo a, a chhuahsan dawn nge dawn lo tih chu politics-a tuite ngaihven a ni mek. Ani hian thangthar a kian thei tih a sawi tawh a, mahse party lamin a bial a chhuahsan a nih pawhin a duh a nih chuan bial danga ding turin an duh nia hriat a ni. Speaker Lalrinliana Sailo chungchangin politics titi a luah bawk a, ani hi a ding dawn nge dawn lo tih chu politics-a tuite hriat chak a ni. Aizawla an bial awla ding tur thenkhat chu an tifel tawh.
Congress party an intifel titih tawh a, anni hian bial tam zawk an tifel tawh. Tun hnaia an thu tharah chuan Aizawl West II-ah MLA hlui Dr H Ngurdingliana a ding dawn a, Aizawl South III-ah pawh Rosiamngheta a chiang tawh. An president Lalsawta dinna tur a la chiang lo a, Aizawl South II-a ding tura ngaih chu a ni.
MNF leh Congress hian tun karah an tihfel a rinawm tih thu dawn a ni. Congress MLA KT Rokhaw chu MNF-ah lutin a bial ngai Palak biala ding leh tura ngaih a ni a, Congress party pawhin Palak biala ding tur hi an ngaihtuah tih thu dawn a ni
Party-te’n candidate tur peih fel tan
