Dampa bialah bye-election neih a ngai dawn a, inthlan puan la ni lo mah se political party-te’n he bial lam hi an hawi. Mipui lamah pawh politics ngaihvente chuan Dampa bial lam hi an hawi mek.
Vanduaithlak takin Dampa bialtu MLA Lalrintluanga Sailo a boral a, hei vang hian bye-election neih a ngai dawn a ni. Danah chuan thla ruk chhungin inthlan that tur a ni a, inthlan buatsaihtu lam an la ngawih avangin inthlan hun tur hi hriat a la ni lo.
State-a rorel lai ZPM chuan August ni 21 khan Dampa bial inthlan thata an candidate tur ngaihtuahtu tur Nomination Committee an din a, Zirtawpni tlaiah khan an thukhawm nghal.
Dampa Constituency By-Election Nomination Committee-ah hian ZPM president chu chairman a ni a, member pasarih zingah chief minister pawh a tel.
Dampa bialtu MLA chawl ta Lalrintluanga Sailo te pawl, MNF-in a hranpain nomination committee an la din lo a, thla thar lam an nghak tih thu dawn a ni.
“Thla khat a liam awrh a, Assembly Session-ah pawh an la sun lo a, nomination committee din nan a la hma kan ti deuh,” tiin MNF hruaitu pakhat chuan a sawi.
Congress party pawhin nomination committee an la din lo a, anni pawhin an din har lo turah ngaih a ni. Dampa hi an party thatna thin a ni a, Dampa bial pian hnua tling hmasa pawh Congress hi a ni.
BJP lamin thawm an la nei lo a, tun hnaia party pakhat atanga chhuak, MLA candidate te pawh lo ni tawh chu BJP-ah hian a lut ang a, Dampa bial bye-election-ah a ding dawn a ni ang tih ngaihdan a awm.
ZPM leh MNF-ah chuan hming ri an awm a, Congress atangin hming ri awm chiah lo mah se ding tura han ngaih theih mai chu an awm. Chung vel chu tunlaiin political party-te leh politics ngaihvente titi a ni a, inrinsiak hun lai a ni.
Party-te’n Dampa bial lam hawi
