State Transport Authority-in Kolasib tan auto rickshaw permit leh two wheeler taxi permit 200 chuang a pek thar leh avanga lungawiloin Kolasib Auto Rickshaw Drivers’ Union (KARDU) chuan District Transport Office thawktute chu hna thawk thei loin Ningani atang khan an dang.
Kolasib khawchhunga tlan tur hian auto rickshaw (registration atangin) 388 awm mek a, tunah permit thar 112 pek belh lehin, two wheeler taxi permit 93 leh taxi permit 43 pek a ni bawk. KARDU hruaitute chuan tunah pawh an in tam chhuah tan tawh a, intlanchhawkte an sawi mek lai a, tum khatah permit tam tham tak pek chhuah a ni chu an hrethiam lo tih an sawi. “Permit pek hrim hrim hi kan dodal loa, mahse tun tumah hi chuan a tam tham em a, stand pawh sawrkarin min pek belh thei tawh lo,” tiin permit hmu thar zingah hian eizawnna atana hmang lo tur chhungkaw khawsak harsa lo, ruling block hruaitute, excavator nei pha te, a hmaa permit lo hmu tawh te, chhungkaw khat atanga permit hmu te an awm niin an sawi.
KARDU hruaitute sawi danin, kum 2021 khan DTO chuan lirtheia pawl hrang hrang aiawh leh Consumer Union telin a kokhawm a, hemi tum hian Kolasib district mipui zat thlirin tum khatah sawrkarin permit 10 aia tam pe lo se, Kolasib-ah 4 leh khaw dangah 2 diat diat, tiin thutlukna an siam tih an sawi a. Permit pek a nih thu an hriat hian Transport minister TJ Lalnuntluanga pawh a office-ah hmuh an tum a, mahse minister hian hun a siamsak thei lo nia sawiin, an lehkha hi minister PA hnenah an dah a, kumin August 23 tlai dar 5 thleng khan permit pekna order hi cancel turin an ngen tih an sawi a ni. An lehkha copy hi bialtu MLA/minister K Lalrinliana leh bawrhsap John LT Sanga an pe tel tih an sawi bawk.
Zawhna chhangin, bialtu MLA/minister hnenah an harsatna hi an thlen tawh a, mahse STA thutlukna a hriatpui ve loh thu a hrilh a, hma a lakpui thei lo ni ah an ngai tih an sawi. An thiam anga hmalakna kalpuiin, tiamchin awm loin Kolasib DTO office thawktute chu office kal thei lovin an dang tih an sawi a ni.
Tunah hian Kolasib khawchhunga tlan tura tih passenger phur lirthei hrang hrang permit hi a hmutute kut a la thleng loa, lakchhuah dilna an thehlut mek nia thu dawn a ni.
Passenger phur lirthei permit pek tam vangin DTO office dang
