Reuben Lalnunthara Hnamte
Mi tam berin kan sawi thin leh, titi na-ah te, thuhriltute pawhin an sawi tam tak chu kan rama sualna tamzia leh thalaite zinga sualna pun nasatzia hi a ni. A dikna chin pawh a awm ang, nitin Social Media leh chanchinthar lamahte ruihhlo man te, sualna chi hrang hrang puanchhuah a tam hle thin a. Inti zawlnei deuhte phei chuan kan ram sualna sim tur tamzia leh, Pathianin Zoram sualna avanga a hrem tur lo tlangaupui tawk lah an awm reng bawk thin a ni. Thil tha lam ai hian thilsual lam hi a thangchak zawk emaw tih tur a ni a. Mi te thiltih pawh hi a tha lam ai chuan a chhe lam sawi nuam kan tiin, a thang chak zawk a, kan chhinchhiah duh hle bawk. Mi thenkhat phei chuan mi chanchin tha lam sawi tha duh si lo hian a chhe lam ngawt hi sawi nuam an ti a; mi chanchin chhe lam sawi tur phei hi chuan kan che rang thei hlawm hle zâwng a nih hi. Kan ram politics pawh hi chutiang deuh chu a ni zo tawh a, a bilhah tho tawh hek lo le; politics hi insawiselna hmunpuiah kan chantir a ni deuh ber tawh a nih hi maw. Mahni kan ingaihdanah hi chuan kan dik vek bawk thin si a, a buaithlak teh zâwng a nih hi.
Zorama sualna pun nasatzia chu kan hre theuh a, nimahsela, mi zâwng zâwng hi an sual lo tih hriat erawh a pawimawh hle. |halai ruihhlo ti leh hmeichhiat mipat lama kal nasa an tam laiin; thalai invawng thianghlim fel tak tak hi kan ram hian kan nei teuh mai. Nikum 2023 March thla atangin Prayer mountain-ah Director-in ka awm a, a tak ngeiin ka hmu a ni. Prayer Mountain rawn hmangtu tam ber hi thalai an ni tlat mai; KTP, TKP, SAY, PYD ten an rawn hmang reng a, a chang chuan |awngtaina In 72 lai awmte hi tawngtai inchan lovin an innghak thup thin. Kohhrana nuho pawlte, Kohhrana mipa pawl lam te an rawn kal chamchi bawk. Chu mai a ni lo, tawngtai chawngheia riak hi thalai an awm reng a, a then chuan ni 3 leh zan 3 te, a then kar khat te, a then thlakhatte chawnghei an riak thin a ni. |awngtaia chawngheia riak hi engtik lai pawhin mi 10 atanga 20 hi chu an awm reng ang a ni. Ni tin mi 10 atanga 30 inkar hi tawngtai Bethel neiin an lokal reng bawk. “Pathian hnathawh ropui tak lo thleng thin hi tawngtai reng thintu emaw lo awm nen chhui zawn theih a ni thin,” tia D.L.Moody a lo sawi hi a dik hle a ni. Chutiang chuan kan ram hi sualna a punga a chhia kan tihrual hian mi tha leh Pathian duhtu |halai rual hi an va tam si em!
Mak deuh mai chu Prayer Mountain hi Pathian Thlarau hian a luah tlat tih tur a ni. Nupa lama harsatna nei te, ngaihzawng lama harsatna neite, mahni mimala harsatna nei tam tak rawn bethelin an rawn riak thin a, malsawmna tam tak dawngin an haw thin, Ramhuai man te thlengin he hmunah hian an lo kal a, ramhuai te pawhin he hmun an hlau a ni. Damna leh Thlaraui pawlna nasa tak changin an haw leh thin. Kohhran bik awm lo, mitin tana tawngtaina tur atana hawn a nih angin Kohhran hrang hrang hi he hmunah hian retreat-te, bethel-te neiin an lokal reng a ni. Ministry hrang hrang leh Evangelist team hrang hrangten an rawn hmang tangkai em em bawk. |awngtai mi tam takte avang hian Lalpan kan ram hi min chenchilh reng a ni. Kan ram Kristian tamna inti ram siah hian nupa inrem lote, sex hmansualnate, ruihhlo hman sualna leh a dangte tam hle mahsela, Lalpa tana tawngtaia he hmun sang leh hla taka lokal thinte avang hian kan ram chu chhanchhuahin a awm zel ang.
Corruption hian kan ram hi min tibuai hle mai a, corruption han tih hi pawisa lakluh diklohna mai a ni lo; mahni hnaa dawngdah tak te, hun vawn dik lohte, aikal la te, dik lo taka document lem hmanga hnathawkte leh a dang tam tak a awm. Chutih lai karah chuan mi tha tak tak leh rinawm tlat an awm bawk. Kristian ram siah hian mi dik takte chu sirah hnawlin hnawk kan ti em em mai a, mi mawl leh nachang hre lovah kan puh lek lek mai zâwng a nih hi. Abraham Lincoln-a’n “A tha ber beisei la, a chhe ber hmachhawn rawh,” a lo tih thin hi kan rama mi dikte hian an tawh mek chu a ni. Kristianante, Kohhrante kawrah hmanga lemchang thin mi engemawzat an awm lai hian mi dik leh tawngtai mite avang hian kan ram chu Pathianin a la hum reng a ni. Helai hmuna |halai rual za tam tak tihtakzeta tawngtaia Lalpa au thintute hi an va hluin an va hmuhnawm thin em! He hmun atang hian ram hruaitute tan te, kohhran tan te, mipuite tana tawngtai thinna hian kan ramah harhna dik chu a thlen zel ngei ang.
Zofate inzawmkhawma chenna tura a lo buatsaih, zofate tana Jerusalem Mizoram hi Lalpa Thlarau nen a inzawm tlat a. Chutianga kal lova, thil dik lo ti tu, sualna pawmzam a, hlemhletna pawisalotute hi chu Lalpan a timualpho zel dawn. Thihna kan tawk tam em em te, natna kan tuar te, ruihhlovin heti ema kan ram min tibuaite hi Lalpa tana kan rinawm tawk loh vangte pawh a ni thei a ni. Ram hruaitute hi mipui ten kan thlawp tlat a ngai a, mipuite kan dikloh chuan an tum angin kan ram hi siamthat a har dawn a ni. Ram hruaitute hian an theihtawpin ram thatna tur chuan hna an thawk theuh mai, mipuite hian kan duham leh mahni hma kan sial lutuk avang hian kan tihsual tir thin tam tak a awm. Chuvangin kan ram hi rorelna dik a awm a, khawvel hmundang leh state dang atangte pawha entawn tlak kan nih theihna turin simna dik leh Thlarau Thianghlima thuam ni turin tih takzeta simna duha tawngtaina nen Lalpa i au teh ang u. Chutih lai karah chuan thalai invawng Thianghlim leh fel, tawngtaimi, Pathian duhtu tak tak kan nei hi a van lawmawmin a ropui em! Mi zâwng zâwng hi kan sual vek lo ve, kan ram lah a chhe vek hek lo; mi tha leh dik engemawzat leh tawngtai mite kan neih avang hian kan ram chu chhanchhuahin a awm zel ang.