Rev Dr Ramengliana
Pathian thu kan hriat thiam tirha ka lo pawm dan, tun hnua ka thlak tak daih chu Pathian mi hman chungchang hi a ni a. Tluangtlam angreng takin Pathian tana an inserh thianghlim nasat poh leh a hmang nasa mai dawn niah ka lo ngai thin a. Hei hi a dik famkim lo hle tih ka hre thiam chho ta a. Eng emaw zawnga chhut phei chuan theology (Pathian thu pawm dan) hrisel lo tak a ni thei tlat. Chuvangin he thu hi han sawi fiah hret kan tum dawn a ni. Rawngbawltu lar, mi hriat hlawh zualte kan en danah min puih ngei kan beisei. Tin, rawngbawl ve kan tumna kawngah a tangkai bawk ang a.
Pathian mi hman nih leh inserhna a kal kawp tha
He thu erawh hi chu a chiang – Pathianin ama tana thahnemngai, ama tana inserh thianghlimte chu a hmang thin a ni. Hei hi hre rengin Pathian tana eng emaw tih kan tum ve chuan keimahni nun kan uluk a ngai hle. Miten sual langsarah kan fihlim lo tih an hriat reng a, sual zep ruk kan pai ten tun a ni tih kan inhriat chuan Pathianin a duh angin min hmang mawh hle ang. Pathian mi hman pawimawh tak takte, ram pum huap leh hriat hlawh tak takte hi an nun an han lepse-a an hmuh tlangpui ‘common denominator’ chu – an nun a thianghlim a ni tih hi a ni.
Rawngbawlna hlawhtling tak te, mi ngaihsan leh ram pum huapa mi lar nih hial te pawh lo ni se, an nun a thianghlim fal vang leh Pathian thu an awih nasat em em bik vang a ni lo tih erawh kan hriat a tha. Rawngbawlna chu Pathian khawngaihna vang a ni a; phu loh malsawmna a ni tih kan vawn reng a tha. A fel fel a hmang nasa a, a tha tha Pathian rawngbawltu ropui an ni, tia ngaih mai hi chu a tluangtlam mah mah a. Rawngbawltute inngaih dan leh mi dangin kan va hmuh dan a dik tluantling lo vang a; kan nihna dik tak pawh lovin, an nihna dik tak kan hmuh kan daih thei dawn a ni.
Inserh nasa apiang Pathianin a hmang nasa kher lo
Pastor pakhat chu a bialah Gospel Crusade an nei a, an hlimin thu a sawi tui hlep hlep hle a. Chutih lai chuan Upaten nula pakhat a rai thu an lo dawng a. Hrilh an hreh hle a ni awm e. Pastor pakhat rawngbawlna atana tla tawhin min hrilh pawh Crusade/Camping neiin thla 2/3 inah pawh an hawng hleithei lo va, chutih lai chuan an rawngbawlna khaw nu lepchiah pakhatin a mutnaah panin a lo chetsual pui rap mai. A hnuah a naupai tirtu niin a puh leh si. A mualpho thlak hle. Speaker tha, rawngbawltu lar, Pathian mi hman nia khan hriatte hi mi zawng zawng aia an fel leh thianghlim vang a ni lo tih chu a chiang hle.
Tunlai khawvela social media a lar hnuah phei hi chuan sapram zawka rawngbawltu lar, kan ngaihsan ber berte chanchin duhawm lo leh tenawm tak tak hriat tur a tam hle mai. An thu sawi ngaihnawm ti em ema kan thlir doh doh lai renga nun bawrhbang tak lo nung ru reng tih hriat chhuah te, an thuziak ngaihnawm kan tih tawp, Pathianin talent a pek bik liau liau nia kan hriatte kum 10 tel mahni nupui ni lem lo lo kawp tlat mai te, Pathian rawngbawlna kawnga ham strict ber ber thin te an tawp ruk rengzia han hriat te leh Megachurch pastor, rawngbawlna hlawhtling ber nia lang thenkhat nun tawp rukzia an han hai lang mai hi chu thil hi a lan ang mai chu a ni lo tih a hriat theih mai a ni.
Tunge thlarauva mi lian?
A chang chuan Pathian pawh hian a rawngbawlnaah hian a mit a siai lui ve thin a ni. A rawngbawltute tlin lohna chu a nih ang anga phawrh chhuak nghal lovin a hmu lo lui fo a. Hei hi mi thenkhatah a langsar zual bik thin. Tunlai khawvela Christian Celebrity an awm tak nual hnuah phei hi chuan ni thei tak tur a ni. A tawk a tih tawh hnuah a rawn pho lang ta thin ni ngei tur a ni a. A tihmualpho duh tak lem loh pawh tam tak an awm tho ang. Rawngbawltu lar, Pathianin a hman nasat nia kan hriatte pawh chak lohna nei ve leh tisual thinte an ni a. Pathian thu awih ber ber an ni chuang lo. An thu tuipui leh ngaihthlak te chu kan sawtpui viau thei a ni thei e. A tha vek mai. Thlarauvin danglam takin a hmang bikah kan ngai a ni thei e. A pawi lem lo. Mahse, mihring ve mai an ni tih hriat thiam a tha. Vantirhkoh sual nei lo ena en lo tura fimkhur a tha e.
Pathian tana an inpek nasatzia ang zela Pathianin hmang nasa anga kan ngaih phei chuan an ni anga a hman nasat loh nia kan hriatte kan hmu hniam zawk mai dawn a. Mi hriat hlawh lem lo Pathian tana inserh thianghlim zawk an lo awm reng thei tih hriat tur a ni. Tin, rawngbawltu lar thenkhat, a ruka lo bawrhbang reng site hian an rawngbawlna miin a hlut reng avang hian Pathian an chungah a lawm tho emaw tiin mahni leh mahni an inbum thin ni tur a ni. Lar te, rawngbawlna mi ngaihsan tak nih te, mi hriat hlawh te hi thlarauva sanna thil a ni lo tih hriat thiam mai tur a ni. Setana pawhin hetiang mi hi chu a din thei. Pathian thlirna mit chu a dang a, mihring tehfung ang a ni ve si lo. Engkim kan hriat tlat loh avangin kan thlirna tarmit pawh fimkhur taka kan hman a tul thin.
Mit puitlinga en thiam
Mihringte hi chak lo ngang kan nih avangin kan tehfung pawh hi a dik lo fo thin tih a hriat mai a. Pathian rawngbawlna leh a tana nun chhuahna kawngah pawh hian kan indawngsawng fuh zan lo fo mai a nih hi. Kan tehfungte hi a lo khawvel leh thin. Ngaisangtu tam mihring neih hi thlarauva ropuina emaw kan ti a, boruak lian neih te hi Thlarau hnathawh ropui nen kan hmuh belhbawm mai thin. A tul chin awm mah se lar leh Thlarau Thianghlim hian inzawmna sawisel thiang lo a nei lem lo. Kristian Celeb nih hi Kraws kawng zawh thui vang a ni kher lo! Rawngbawltu lar tak pakhat tlak chhiat bul intanna an sawi chu a larin thil a ti thei tawh lutuk a, a hote zinga thil thil dik lo hriate pawhin an sawi chhuak ngam tawh tlat lo a ni awm e. A sawp chu a nasa khawp mai. Kan teh fuh loh chuan kan tan leh an tan a pawi thin a lo nih hi.