Pathian thu hmanga chak lawm Lallianzuala Chhangte

Pathian thu hmanga chak lawm
Lallianzuala Chhangte
Indian Super League (ISL) khelh tan takah Pathianni khan Mumbai City FC chuan an match hnihna khelin, Mizo tlangval Lallianzuala Chhangte goal khat tihluh hmangin mualneitu Kerala Blasters FC lakah 1-0 hnehna an chang a, a hnu lawkah Lunglei tlangval hian social media pakhat Facebook lamah South Indian team an hneh lai thlalak hrang hrang tarchhuak chungin caption-ah Pathian thu a dahchhuak.
LZ-a Pathian thu tarchhuah chu Isaiah 26:3 thu – “I chunga rilru nghattu chu nangmah a rin che avangin thlamuang tak maia awm turin i veng ang,” tih a ni.
Mumbai City captain Lianzuala Chhangte hi tun season ISL-a Mumbai City player goal khung hmasa ber niin, Mumbai hian an game khatnah si khat fai bawkin an mikhual Chennaiyin FC l hneh tawh bawk mah se kha mi tuma an chakna goal awmchhun kha ‘own goal’ a ni.
Pathianni Kochi khaw inkhela Islanders chakna goal kha second half tir lam minute 47-a LZ-a thun niin, chu mi hma first half-ah Argentine forward Jorge Pereyra Diaz chuan penalty atanga Mumbai hmahruai theihna hun tha bawhpelhin, half time-ah goal thun loin team pahnih an inthathen phawt.
Tarlan tak angin Captain Lianzuala chuan team pahnih thenhrangtu goal pawimawh a khung er ta zawk a, Player of the Match award dawng chungin a team a chakpui.
Mumbai City FC hian khelh hniha hnehna la chang ve ve chungin ISL table-ah pathumna an luah a; an chungah point ruk ve ve nei chungin hmahruaitu East Bengal FC leh pahnihna Jamshedpur FC an awm a, Bengal hi Mumbai aiin goal difference-ah an sang zawk a ni.
Game hnih khel tawha point la hmu zo lo Kerala Blasters hi team 14 inlan zingah 12-na an ni mek thung.
Indian Super League season kal mekah he thu buatsaih lai thleng hian Mizo player paliin goal an khung tawh a; Mumbai captain LZ-a bakah hian Pathianni inkhel dangah Lalrinzuala Hauhnar chuan Bengaluru FC mualah NorthEast United FC tlawm tur chhanna goal thunin, he goal khat hi table-a pariatna luahtu hmarchhak team-in match hnih atanga point khat an hlawhchhuahna goal pawimawh a ni zui ta nghe nghe.
Kanteerava stadium-ah Rinzuala hian luh hmasak a chang lo a, second half tir lam minute 64-ah NorthEast United head coach Juan Pedro Benali chuan Mizo tlangval hi luhtirin, hetih lai hian first half minute 18-a Braian Sanchez-a goal hmangin mualneitu Bengaluru khan si khat faiin hma an hruai mek a ni.
Lalrinzuala hian minute li chiah khelmualah hun a hmang hman tihin mikhual team siphurh sut ta mai a; Bengaluru FC head coach Renedy Singh leh a naute an hawihai a, stadium chhunga mipui tam zawk an ngawi duk bawk!
An match hmasabera tlawm tawh Highlanders hian an game hnihnaah India national football team captain ni mek Gurpreet Singh Sandhu leh India captain hlui Sunil Chhetri bakah a chipui Lalremtluanga Fanai khelhna Bengaluru khelmualah ngei season thara NorthEast United point hmasaber hringtu goal hlu bik a khung a, ISL-ah Mizo hming a tha zel!
Kar liamta Inrinni khan SC Delhi right midfielder Augustine Lalrochana chuan East Bengal FC mualah minute li lek a la kal hman tihin mikhual hmahruaina goal a khung er zawk a, Bengali fans ka a hup chiang kher mai!
Chu tah, minute thum a liam leh dawn tihin Lunglei forward Edmund Lalrindika chuan Bengal si phurh a rawn sut ve leh a; hun a tawp meuh chuan home team East Bengal hi 4-1 zetin an chak a, table-ah hma an hruai.
Lalrindika hian goal khat a khung bakah minute 12-naa a penalty hlawhchhuah hmangin Spain rama piang, Singapore tana international level-a khel zui ta Youssef Ezzejjari chuan East Bengal hmahruai tanna goal a thun.