Pathianin tha a tih ang zelin min ruatsak – Zoramthanga

MNF tan Pathianin tha a tih ang zelin hun a ruatsak tih an party president Zoramthanga chuan a sawi.
Zirtawpnia MNF office Mizo Hnam Run inkhawmah Zoramthanga chuan MNF chu Pathian remruat ang zelin an kal a, kawng engkimah Pathianin tha a tih angin hun a ruatsak a, a remruatna tuma dal theih a ni lo tih a sawi. MNF sawrkar chhungin Covid19, lirnghing, ramri buai, ram buai adt. in min chimbuai lai pawhin an tan Pathianin rem a ruatsak a, MNF chu mipui tana ding an nih angin mipui tana harsatna awm lo thei tur ang berin an kal a, Pathianin tun hi a hruai thleng tih a sawi a ni.
MLA Inthlan tluang tak leh harsatna liantham awm loa kan nei thei chu lawmawm a tih thu MNF president hian a sawi a. MNF official candidate-te an tlin theih nana theihtawp chhuahtute chungah lawmthu a sawi tih a sawi. “Pathian leh mipui zarah kan sawrkar leh ngei anga, chak zawkin ram hi kan kaihruai leh ang,” a ti.