Pawikhawihna tuar naupangte tana hmalakna tur tul an zirho
POCSO dan Section 39-in a phut angin, naupang khuaikhem leh pawngsual tawk ten court-a finfiahna an pek hma leh an pek huna harsatna a awm lohna’na a tuartu naupangte fuih a, thlamuan a, huaisenna an neih theihna tura buatsaih thin tur mithiam bik pawimawhna leh Juvenile Justice dan siamthat chungchang chu Ningani khan Aizawlah zirho a ni.
National Commission for Protection of Child Rights (NCPCR) leh Mizoram State Commission for Protection of Child Rights (MSCPCR) tangdun buatsaih hmanpuitu MSCPCR secretary Lalengvari chuan MSCPCR hmalaknain Aizawl District Court-ah Child Welfare Officer’s Room leh Children’s Room chu naupang chhan hrang hrang avanga court-a kal ngaite tan siam a ni tih a sawi a. Mizoram Police nen pawh thawh hona tha tak an nei tih a sawi.
MSCPCR-in Special Juvenile Police Units (SJPUs) leh Child Friendly Police Station chu uluk takin a enzui reng tih a sawi a. MHIP nen thawhhona tha tak neiin, kum tling lo domestic worker-a chhawr chungchangah leh ram pawna thawnchhuah an nih chungchangah an inrawnkhawm thin tih a sawi. Hetianga law enforcement department leh NGO nen tha taka an tan ho chuan naupangte tan nasa takin hma an sawn theih a ring tih a sawi bawk.
Workshop-ah hian MSCPCR mithiam leh NCPCR mithiamten thupui thlan sa hmangin zirtirna an pe a. Mizoram Police, Women & Child Development department hnuaia Child Care Institutions thawktute, District Child Protection Unit lam mi, MHIP member- te leh zirlaite an tel a. Naupang khuaikhem leh pawngsual tawk, naupang a bika venhim, tanpui, enkawl leh chhanchhuah ngai leh, dan bawhchhia kum tling lote tana inkaihhruaina dan zirho a ni.
Pawikhawihna tuar naupangte tana hmalakna tur tul an zirho
