Pawl hrang hrangin CM an kawm

Chief minister Lalduhoma chu Zirtawpni khan pawl hrang hrangin a pisa-ah hmu in an kawm.
United Kingdom-a Mizo nurse-te tana hna hmuhsak thin Mizoram OET Coaching Hub (MOCH), Charkos Global peng pakhat neitu Lalrinawmi Fanai leh Mary Zothanchami te chu Zirtawpni khan a kawm a. MOCH sawi danin, Charkos Global UK nen tangdunin kum khat leh a chanve Mizoramah hna an thawk tawh a. UK-a nurse hna thawk duh mi 19-in an training buatsaih an pass tawh a, an zinga 14-in UK-ah registered nurse hna thawk mekin, thla khatah India pawisa in nuai thum vel an hlawh phak a ni. Hetianga nurse hna thawk tura an inbuatsaihna chitin reng an ni hian an ngaihtuah sak a ni.
Mizoram Youth Commission nena inremna siamin MYC hian nurse training-in hna a hmuh chuan, sponsor nan Rs. 50000 an pe thin a. Mahse sponsorship hi an tihtawp leh tak avangin harsatna an tawk tih an thlen a, chhunzawm leh turin an dil a ni.
Chief minister chuan tunhnaia British Deputy High Commissioner in-charge of East India Dr Andrew Flemming nen an inkawmnaah Mizo nurse tam zawk UK-a thawn an rel a, chak taka bawhzui an remti dun tih sawiin, chumi hna thawktu pakhat chu an nih avangin a theih anga tanpui a that a ring tih a lo hrilh. An thil dil chinchang hrilhin MYC chairman thar tur phone in a be nghal a ni.
Student Bar Council, Aizawl Law College hruaituten an kawmnaah chief minister hian an zirlai tha taka kalpui a, ram tana chhenfakawm, India ram hmun dangah pawh zahpuiawm loh khawpa rintlak nih tum turin a lo fuih a. A hnena an harsatna thlen chu document fel tak nena thlen tha leh turin a hrilh. Ram mamawh thil tangkai a nih avangin theihtawp chhuaha a lo umzui tur thu a sawi a ni.
Student Bar Council hruaitute hian Bar Enrollment Centre chungchang, LL. M zir theihna hmun neih an duhna, an college campus thar chungchang, High Court hrang neih thu leh thil pawimawh dang an thlen a ni.
India Mission Association (IMA) hruaituten chief minister an kawmnaah an hmalak dan tlangpui a zawt a, an rawngbawlna in rah tha a chhuah zel avangin lawmthu a hrilh. MP a nih laia Christian Dalit Liberation Movement-a patron a lo nih tawh thu leh chumi kaltlanga hma an lo lak ve tawh dan a sawi a ni.
IMA hruaitute hian kum laihawlah Aizawlah general body meeting an nei dawn a, Synod Mission Board-in a lo buaipui dawn tih an sawi a. An inkhawmpuina hmunhma ena rawn zin an ni tih an sawi. Kristian rama Kristian chief minister, kohhran upa ngat hmuh an chak vang leh, an inkhawmpuiah keynote speaker atan sawm tura leng an nih thu an hrilh a ni.
Chief minister hmuhnaah hian IMA general secretary Rev Dr Isaac Raja, IMA global ambassador Rev. Rajesh Tiwari, Synod Mission Board secretary Rev R Lalhmingsanga leh midangte an tel a ni.