India chhim lama court chuan Karnataka-a politician hriat hlawh, MP pawh lo ni tawh thin chu a ina hnathawka a chhawr pakhat pawngsuala puhnaa thiam loh chantirin dam chhung lung in tang turin a hrem.
Politics-a an chhungkua pawh hriat hlawh tak, Prajwal Revanna-a hremna hi Inrinni khan puan a ni a, a hma ni khan a hnuaia thawk thin khawiha puhnaah hian thiam loh chantir a ni.
Kum 34 mi hi dan bawhchhiaa puhna hi kum 2023 khan sawi chhuah tan niin social media-ah video bawlhhlawh tak tak a darh atangin a ni a, ram pumah sawi a hlawh hle nghe nghe.
Revanna-a chuan an puhna chu a dik lo tih a sawi a. Zirtawpnia thiam loh chantir a nih pawh hian hrehawm ti taka awmin hremna nep zawk pek a dil nghal bawk.
A tukah hremna hi puan a ni ta a, court sang zawkah ngaihtuah tha leh turin a ti thei bawk.
Indian prime minister hlui, H D Deve Gowda tupa, Revanna-a hi Janata Dal (Secular) party hruaitu niin Prime Minister Narendra Modi-a kaihhruai BJP sorkarah hian an thawhpui zingah an tel mek.
India-ah hian politics-a inhnamhnawih lian zinga hetiang hremna tawk hi an awm tam lo hle.
Revanna-a hian April, 2024 khan amah puhchhiatna video a darh chum chum hnuah India a chhuahsan a. Hetih hun lai hian video darhte chungchang hi engmah a sawi lo va, a office-a hotu lian erawh chuan an ngaihven a, a dik lo tih a sawi thung.
Thla khat hnu, Germany atanga a haw hnuah man zui a ni.
Revanna-a hian pawngsual thubuai dang pahnih leh mawi lo taka mi khawih thubuai dang a la nei bawk a. Hengte pawh hi amah chuan a pha.
Pawngsual vanga dam chhung tang turin MP hlui hrem
