People’s Conference party chuan Treasury Square-a an office building chu thiatin sak that an tum a, a hmingah ‘Brig. T Sailo Rûn’ tih vuah lawk a ni.
Party office building hlui thlahna pualin Zirtawpni khan hun hman a ni a. An party hruairtu hlui, tuna an office dinglai mek satu, ex minister C Chawngkunga, ex minister F Malsawma, ex MLA Dr JV Hluna leh hruaitu hlui dangten an telpui.
PC president Vanlalruata chuan an party kaltlanga minister, MLA leh hruaitu ni tawh thinten PC party leh ram tana sul an lo sut tawhnate a ngaihhlut thu leh hmabak la awmte an party-in theihtawp chhuaha ram tana chhunzawm zel an tum thu a sawi.
Office building thar sak dan tur PC treasurer HK Liansawta’n a sawi danin, concrete-a sak a ni anga, Zopa chhiara chhawng 6 tur a ni. A hnuai lam chhawng hnih chu lirthei dahna (garage) tur a ni a, chhawng thum dang chu office atana hman tur a ni. A chhawng chung ber chu hall tura duan a ni a. A chung zawlah restaurant dah tum a ni.
Khawpui thang zel tur thlir pawhin hun engemawchen chu Aizawl khawpuia in mawi pawl ni tura duan tum a ni a. A hming atan ‘Brig. T Sailo Rûn’ an hmang dawn a ni.
Building thar sak hna hi kumin February-ah tan tum a ni a, zawh hun tur ruahman lawk a awm lo. Hruaitu leh member te phur leh inpek danin a hril dawn a. Chutih rualin kumin favangah chuan luah luh leh hman ngei an tum.