People’s Conference chuan kumina Lok Sabha inthlanah candidate an nei dawn tih an party president Vanlalruata chuan a sawi.
PC party hian an office, Treasury Square Venghlui ami chu an sa tha mek a. He building hi ‘Brig T Sailo Run’ tih tum a ni. Building sak hi la zofel lo mah se, an party office bik chu Thawhlehni khan an president hian a hawng a. PC party nilai leh ni tawh thin an hruaitu mi thenkhat an tel a ni.
PC president chuan an party thuvawn leh politics hrim hrim innghahna bul chu kan ram kan hnam kan sakhua a him tur a ni, tih a nih angin, an party chuan he ramah hian Zofate hi him ila an duh ber tih a sawi.
Inthlana candidate neih chu party din chhan pakhat a nih laiin 2023 MLA inthlanpuiah candidate an nei lo chu an party chak loh lai a ni, tiin, tho leh tura ke an pen a ngai a, chumi atan chuan party insawhngheh hmasak a ngai, office pawh nei lo an nih avangin office pawh an hawng ta chuk chuk tih a sawi.
“Office pawh kan nei tawh a, inthlan hmachhawn turin kan insangmar tan. Inpeih hman lo chunga kan hawn luih chhan pawh MP inthlan atanga candidate neih kan tum a, candidate tha tak kan nei dawn a, kan tang chho nasa dawn. 2028 MLA inthlanah sawrkara tel ngei turin tan kan la dawn a ni,” Vanlalruata hian a ti.
Kan ram mamawh bulpui paruk chu kum 1978-a PC sawrkar siam lai pawhin ram mamawh bulpui a ni tawh a, tun thlengin kan mamawh bulpui paruk ala ni reng a, hei hian sawrkar kal dan awmze nei zawka kalpui a ngai tih a tichiang hle tih a sawi. Tunah phei chuan ramin mamawh a neih belh a, mamawh 12 kan nei tawh tih a sawi a ni.
PC-in MP candidate nei dawn
