Environment, Forests & Climate Change principal chief conservator of Forests (PCCF) Rajeev Kumar Tiwari chuan April 24&25 khan Kawrthah Forest Division a tlawh a, field-a hnathawh dan thlirletin, harsatna awm an zirchiang a, ramngaw humhalh leh enkawlnaa tha zawka a kal theihnan hmalak zel dan tur a sawipui.
April 24 khan Darlak Central Nursery a tlawh a, hnathawh mek a enfiah. Hemi hnu hian Kawrthah-a Division Headquarters a tlawh a, DFO Kawrthah nen department hnathawh leh hmunhma an tlawh a ni.
Kanhmun Range-ah Mualmam-a CAMPA ANR plantation a tlawh a. Division-in thingphun leh ramngaw siam thar kawnga hma a lakna chu fakawm a tih thu a sawi. Division-in harsatna a tawh hrang hrang, Luimawi leh Bungthuam khua, ramri bula teak kih ruk leh tawlh ruka harsatna awm a hmuna a enfiah.
Mizoram -Assam ramri Medili bial pawh tlawhin, ramri buai dinhmun leh a hmunhma a enfiah a. Zamuang-a mimal teak huan, conditional felling scheme hnuaia ram surrender hmasa ber neihna hmun a tlawh a. He hmun hi department plantation atana siamthat leh thing phun lehna tura hma lak mek a ni
Rengdil (Lungkulh Biodiversity Hotspot) PCCF hian a tlawh a. Biodiversity hausakna leh eco-tourism tih hmasawnna lama hmalakna kal mek chu lawmawm a tih thu a sawi.
PCCF-in Kawrthah Division a tlawh
