Power & Electricity department chuan power supply tih ziahawm turin an khawl an thawmtha mek tih an sawi a. Thlasik lai a nih avangin power kan hmang nasa a, chuti chung chuan inrenchem thiam turin mipui an ngen tih an sawi.
Electric current pekchhuah leh hman dan chungchangah P&E department hian ngenna siamin, tunlaiin power supply khaihlak a awm zauh zauh thin a, thlasik laiin mipuiin heater leh a dangte kan hmang nasa a, kan electric line leh transformer-in a zo lo thin a, veng thenkhatah inen chhawk a ngai thin tih an sawi. Heng a awm tawh lohna tur hian theihtawpin hma an la tih an sawi a ni.
Phai atanga power supply kan hmuhna pakhat, Luangmual Sub-Station incoming line-ah 70MW pelh phal a nih loh avangin thlasikah peak load laiin load shedding (inen chhawk) a ngai thin a. Power tam zawka lakluh a nih theihnan conductor lian zawka thlak mek a ni tih an sawi. Tlangnuam Sub-Station a transformer lian, overload avanga load shedding ngai thin tih tawp nan transformer lian dang dah belh mek niin, Chawnpui Sub-Station a transformer lian overload chhawk turin Maumual Sub-Station atangin transformer te (DT) thenkhat chawm then tum a ni tih an sawi bawk.
‘Hmun tam takah electric hrui atan bare conductor kan la hman chu hrui dum (ABC) a thlak vek tum a ni a. Hemi rual hian hrui (service connection wire – LPS, Zonet leh internet cable) kal fel lo zawng zawng siamrem tum a ni. Distribution box kang thin pawh design thar siamin lei tawh a ni a. Heng thlak chhung hi hun engemawchen chu power khaihlak a la awm zel dawn a ni,’ a ti.
Hun dang zawng aiin thlasik chhung bikah power inrenchem lehzual turin mipui an ngen tih sawiin, hmasawnna tur hnathawh avanga power khaihlak awm thinah mipui hriatthiamna an ngen tih an sawi a ni.
P&E-in an khawl thawmtha Inrenchem turin mipui ngen
