MNF sawrkar laia sawrkar laipuiin a bika sum a pek, ‘peace bonus’ tia vuah chu sawi nep tum an awm thin mah se, a nep lo tih MNF president Zoramthanga chuan a sawi.
Thawhtannia Mizo Hnam Runa inkhawmah Zoramthanga chuan MNF sawrkar laia ‘peace bonus’ leh MNF sulhnu sawinep tum an awm thin tih sawiin, MNF sulhnu kha sawinep theih a ni loa, record awm vek leh a taka hmuh theih vek a ni tih a sawi. MNF-in development a din pahnih – sipai ram luah chhuhsak a, MINECO leh Lunglei World Bank Road ringawt pawh a nep loh zia mipuiin an hria tih a sawi a ni.
Chief minister hlui Zoramthanga chuan, kum 1998-a MNF-in sawrkarna a siam khan Mizoram sawrkar sum dinhmun a chhe takzet a. Leiba tam tham takin a delh a. Chu chu an sawi ni loin Congress sawrkara Finance minister ngeiin sawrkar sum chhiat zia hi a sawi tih a sawi a ni.
“Delhi-a Finance ministry nen kan en a, ‘Peace Bonus’ tia hming phuahin Mizoram chhanchhuahna tur sum kan dil a. India rama ram buai ber ni thin kha a ralmuang berah kan tang ta a, chumi pual chuan peace bonus kan dil a ni,” a ti.
Peace bonus kha vaibelchhe 175 an dil a, an dil aia tam daih, an ba rulhna atana daih tur law law vaibelchhe 182.45 an pe a. Hetih laia an plan budget zatve thuak an pe tih MNF hruaitu hian a sawi.
“Peace bonus leh MNF hnathawh ropui tak tak sawi nep tum awm thin mah se, kan sawi ve zel dawn. MNF sawrkarin hmasawnna hna a thawh nasat zia hrechiangtu chu Zoram mipui an ni,” a ti.
Peace bonus sawi nep tum an awm – Zoramthanga
